مشاهدة : 20260
صفحة 1 من 4 123 ... الأخيرةالأخيرة
النتائج 1 إلى 5 من 19

قصه الحب الصادق (قصه مرة حلوة بس حزينه)


مقالات مشابهه موضوع على صله

  1. خواطر الحب الصادق
    بواسطة ايام الحياه في المنتدى خواطر كلمات رومانسية كلام رومانسي عبارات ادبية خاطره جميله
  2. ???? هل تريدين معرفة الحب الصادق من الحب الكاذب ????
    بواسطة xpkaporal في المنتدى ممنوع - موضوع × مواضيع
  3. قصيده حزينه عن الحب الصادق <<< تصيح
    بواسطة احب بنت اخوي في المنتدى الشعر قصائد عربية قصايد شعراء قصيدة شاعر
  4. الحب الصادق ليس مشاعر واحاسيس فقط.
    بواسطة رقه قلب في المنتدى مقالات منوعه موضوع عام منوعات مواضيع
  1. #1
    صورة الدمعه الحائرة
    الدمعه الحائرة غير متصل صعب اننا نوصفه
    تاريخ التسجيل
    Sep 2007
    الدولة
    اسافر بين البلدان (ما لازم اقول من وين ههههههه)
    المشاركات
    5,799
    Thanks
    0
    شكر 0 مرات في 0 مشاركات


    السلام عليكم .

    قصة قريتها اكثر من مرة وليحين اتاثر

    وايد حلوة .
    ارجو ما تكون مكررة

    هذا الحب الصادق ولا بلاش

    روضه بنت حلوه وبنت ناس وهلها ربوها احسن تربيه لكن الايام غيرتها. ؟
    الام رويض فجي الباب يلا قومي وراج جامعه رويض رويض؟ يلا امايه نشي تعبت تراني منج ايديه عورتني من الدق على الباب
    روضه تتحرطم: اوف شو هل الحالة متى الله بيفكني واعرس وافتك من نشت الصبح ومن الجامعة
    الام: روضه بتقومين بادبج ولا شو
    روضه: انشاااالله يامايه اووووف مب حاله قلت لج يوزني و فكيني من الصدعه
    نشت روضه وغسلت ويها واتلبست بكل ضيج وقرف وسارت الصالة عشان تتريق دشت وسلمت على ابوها وامها واخوانها وكلت لقمتين وركبت السيارة عشان اتسير الجامعه .
    في الجامعه
    حصه: روضه شحالج شو بلاج جالبه ويهج
    روضه: سكتي عني ياحصه الجامعه ملل ومب عارفه شو اسوي بعمري
    حصه: شو رايج ادشين الجات ؟!!!
    روضه: لالالا ياحصه انا اخواني مانعين عني هالسووالف
    حصه منو بيدري محد؟ جربي واتعرفي لج على كم وواحد قصي عليهم واذا عيبج واحد عيشي معاه قصة حب احلى عن قصة قيس وليلي
    روضه: انتي شو اتقولين اتعرف على كمن واحد لا عيب البنت المتربية ما تسوي جي
    حصه:ياروضه اي تربيه واي خرابيط حبيبتي هذاك اول الي البنت عيب انه ترمس ريال غريب الحينه عادي لازم يكون فيه تعارف واختلاط .هاذي الدنيا الحنيه دنيا التطور
    روضه: التطورر مب يعني قلة ادب
    حصه: حبيبتي انتي شو بتسوين يعني الي بترمسنيه لا يعرفج ولا تعرفينه عادي مجرد تسليه انتي جربي بس هالمره صدقيني ما بتخسرين
    روضه: ...مادري ياحصه؟؟
    دشت روضه الجات بعد الحاح حصه عليها وما كانت اتعرف انه اغلى صديقه عندها بتكون هيه السبب في ضياع مستقبلها .
    تكرر دخول روضه الجات ادمنت شي اسمه جات،وبالذات عشان اترمس شخص نكه روح قلبي اتعلقت فيه من دون ما اتحس صار حياتها.
    روح قلبي اتصدقين يا المزيونه انا اذا ادش الجات وما القاج سيده اطلع
    المزيونه والله صدق لهاي الدرجه انته متعلق فيه
    روح قلبي متعلق وبس انا هيمان فيج
    المزيونه بس انته ما تعرفني ولا تعرف اسمي ولا شكلي حتى
    روح قلبي من كلامج بس عرفت عنج كل شي؟ ممكن اطلب منج طلب
    المزيونه امرر
    روح قلبي: ممكمن اتسووي لي اد على المسن عشان اقدر اكلمج على راحتي انا و انتي وبس
    المزيونه مادري
    روح قلبي: صدقيني صدقيني ما بتجاووز حدودي بس دام احنا اتعلقنا في بعض خلينا انعرف بعض اكثر اررجوج لا اتكسرين بخاطري وقلبي
    المزيونه: خلاص
    روضه ما كانت اتعرف انه روح قلبي هو ولد خالة حصة وكان شايف صوورتها عند حصه وعيبته واتفق مع حصه على هذا كله
    روضه قامت ماتودر اللاب توب اربع وعشرين ساعه عليه في البيت في الجامعه حتى الحجره ماتطلع منها اهملت دراستها ونست وجود هلها حتى ربعها ماقامت تسال عنهم ادمانها على المسنجر وحبها لروح قلبي نساها كل شي
    حصه: روضه ابا اقولج شي بس اخاف تزعلين
    روضه لا قولي لااتخافين
    حصة: تراني اعرف منو روح قلبي هو ولد خالتي
    روضه شوووووووووووووووو حصه: لحظه لحظه ياروضه هو سالني اتعرفين وحده نكها المزيونه قلت له هيه. اتصدقين انه اتخبل يوم عرف اني اعرفج قام يسالني شقايل شكلج حشرني
    روضه وهيه مستحيه صدق ؟
    حصه الصراحه هو اليوم بيمر عليه الجامعه بس عشان يشوفوج
    روضه لا ياحصه انتي شو اتقولين
    حصه انا ماقلت رمسيه انتي اكيد في خاطرج اشوفين منو هذا روح قلبي الي يحبج
    روضه بس ياحصه انا احس جي اني اخون هلي
    حصه سالم يارويض يحبج قال انه حب طريقة كلامج على المسن وسبحان الله اذا حب شكلج بعد يمكن يخطبج و يستوي ريلج
    روضه هو اسمه سالم ويبغي يخطبني انااااااااا ؟
    حصه هيه يخطبج انتي سمعي كلامي وما بتضعين يا رويض
    روضه تم يا حصيص
    تمت روضه على اعصابها لاخر الدوام وماصدقت يخلص الكلاس وشلت بعمرها هيه وحصه عاد اونها بتوصل حصه عند الباب. وطلعت برع وشافته شافت سالم انبهرت فيه وبوسامته وبسيارته الكروزر ورقمها السياره بو555
    البنت راحت فيها وسالم يوم شافها ويا حصه عرف انها روضه ابتسم لها ابتسامه خلت روضه ماتعرف وين اتودي ويها
    ردت روضه البيت وهيه هيمانه وسرحانه
    الام روضه روويض روضه امايه شو بلاج روضه وصمخ انشاااالله
    روضه: ها ياااااامي
    الام شو بلاج جي متخاديه تراج هل الايام موول مب عايبتني لاترمسين ويانا ولاتيلسين الا يالسه في الحجره وصاكه على عمرج الباب
    روضه ما بلايه شي يامي،مشغوله شوي بالدارسه
    الام انزين يلا سيري بسرعه اتلبسي واتعدلي واكشخي
    روضه ليش بنسير مكان مافيه يامي ورايه شغل على الكمبيوتر
    الام لافديتج قوم عمج بيوون وبيي وياهم سعيد ولد عمج
    روضه عني بلا هالطااري اووف مابا مابا بيلس في حجرتي احسن دام سعيد في السالفه
    الام: انطمي طمج الله مب على هواج سعيد ولد عمج وانتوا محيرين لبعض ومن انتوا صغار سيري اتلبسي الحينه بسرعه ولا والله لو يوصل خبرج عند ابووج
    روضه ياااااااااااااربي انزين انزين
    دشت روضه الحجره وسيده على النت وفجت المسن ويالسه على نار تترايا روح قلبي
    دش روح قلبي: هلا والله بالمزيونه صدق انج مزيونه انا اليوم ما برقد فليل؟
    روضه استحي انتي ليش ماخبرتني انك ولد خالة حصه
    روح قلبي انا والله روحي كنت ماادري بالصدفه جي يوم اتخبرتها عن النك والايميل قالت انج اعز ربيعه لها اتعرفين هذا من حظي والله انج طلعتي اتعرفين بنت خالتي حصوه
    روضه صدق يا سالم
    روح قلبي: يااااوووويلي انا على اسم ساالم اول مره ينكتب اسمي بهاي الطريقه الحلوه ياليتني لو اسمعه
    روضه تسمعه لا ياسالم لهني وبس خلنا على المسن وانشالله بتسمعه يوم بنكون من نصيب بعض
    روح قلبي ارجوج ياروضه مره و حده بس مره وحده
    روضه لا ياسالم اسمع انا بطلع الحينه لانه قوم عمي بيوون بدش عقب شويه
    روح قلبي: بترررررراياج على احرر من الجمر
    اتلبست روضه وطلعت بتسلم اول مادشت الصاله جافت سعيد سعيد ولد عمها كان يحبها حب صادق وكان فعلا يتمناها اتكون زوجه له ويعد الايام والليالي لهذا اليوم
    بو سعيد هلا بنتي هلا شحالج
    روضه الحمدالله ياعمي انته اشحالك يو سعيد الحمدالله
    ام سعيد حيالله العرروس حيالله مرة ولدي روضه بصوت واطي تخسين انتي ولدج
    روضه الحمدالله ياخالوا انتي شحالج ابو روضه ماسلمتي على سعيد
    روضه من ورا خشمها هلا شحالك سعيد بخير والله متولهين شحالج وشو الدارسه
    روضه بخير بخير اسمحولي انا بترخص عنكم ورايه دراسه
    سعيد تو الناس ياروضه مايلسنا وياج روضه مره ثانيه
    ربعت رووضه على الكمبيوتر ودشت على المسن
    المزيونه: هلا سالم اتاخرت عليك
    روح قلبي: هيه واايد لو مادشتي الحينه جان مت
    المزيونه اسم الله عليك انا ولا ا نته
    روح قلبي يااويلي ياويلي ياويلي ما اقدر استحمل هل الكلام شويه شويه عليه
    المزيونه سالم انا استحي
    روح قلبي فديت الي يستحوون والله اوويلي انا



    يتبع 2)

  2. #2
    صورة الدمعه الحائرة
    الدمعه الحائرة غير متصل صعب اننا نوصفه
    تاريخ التسجيل
    Sep 2007
    الدولة
    اسافر بين البلدان (ما لازم اقول من وين ههههههه)
    المشاركات
    5,799
    Thanks
    0
    شكر 0 مرات في 0 مشاركات
    يلا عاد بكمل القصه لما اشوف الردود


    لا تكونوا بخيلين

  3. #3
    صورة الدمعه الحائرة
    الدمعه الحائرة غير متصل صعب اننا نوصفه
    تاريخ التسجيل
    Sep 2007
    الدولة
    اسافر بين البلدان (ما لازم اقول من وين ههههههه)
    المشاركات
    5,799
    Thanks
    0
    شكر 0 مرات في 0 مشاركات
    حرام عليكم

    ولا رد واحد


    انزين انا مابكمل القصه بس جزء واحد <<<<<<< شفتوا كيف كريمه

    وعاد ابي اشوف الردود

  4. #4
    صورة الدمعه الحائرة
    الدمعه الحائرة غير متصل صعب اننا نوصفه
    تاريخ التسجيل
    Sep 2007
    الدولة
    اسافر بين البلدان (ما لازم اقول من وين ههههههه)
    المشاركات
    5,799
    Thanks
    0
    شكر 0 مرات في 0 مشاركات
    هالجزء طويل انشااااااالله ما تملووون
    المزيونه سالم تدري اني محيره لولد عمي
    روح قلبي شو ياروضه لولد عمج شو يعني
    المزيونه هذا الشي مب مهم انا من عقب ماعرفتك وبالذات من عقب ماشفتك اليوم ما ابغيه صدقني
    روح قلبي بس اكيد قبل كنتي اتفكرين فيه على اساس انه حبيب وزوج
    المزيونه يمكن بس هالشي عادي لانهم دوم يقولون سعيد لروضه وروضه لسعيد بس صدقيني الحينه ما يهمني انته وبس
    روح قلبي اسمه سعيد هب حلو اسمي احلي !!
    المزيونه اسمك احلي وانته الاحلي و الاغلى بعد
    روح قلبي اوووويلي ويلالالالالالاه
    المزيونه اقولك باي اخوي يزقرني باي
    ناصر: انتي وينج انبح صووتي وانا ازقرج
    روضه ها لاماشي كنت ادرس ناصر كنتي تدرسين ولا على النت روضه لا ترا هو عندي بحث ناصر انزين يلا تعالي اتعشي بعدين تعالي بخبرج شو هالمذهب الي فيج سلمتي ودشيتي الحجره وخليتي بنات عمج روضه امم ترا الدارسه و ناصر بس خلاص مادري شو من دراسه هاي الي يقول الحينه دكتوراه
    وسارت روضه بتعشا ولقت هلها كلهم يالسين ويتريونها ام روضه وينج حشا من يتي وانتي في الحجره لا اتعبين عمرج يا امي بالدارسة مايسوي عليج
    ام سعيد هيه فديتج مب زين جي وراج عرس انتي
    روضه اطالعهم وهيه ميته قهر خربوا عليها فقيره الكلام مع حبيب القلب ابو سعيد روضه يابنتي انا وابوج نتشاور انه انخلي عرسج انتي وسعيد عقب شهر
    روضه شوووه عرسي انا وسعيد لاياعمي ودراستي احنا تونا بادين السنه
    ناصر يوم الريايل يتفقون انتي مالج كلمه ابو روضه لاياناصر اختك من حقها تدرس سمعي ياروضه سعيد ما بيمنعج عن الدراسه عرسي وكملي ولا شو رايك ياسعيد
    سعيد اكيد يا عمي انا مستعد وحاضر لاي شي تبغيه روضه
    روضه اذا انته مستعد وحاضر اصبر لين هاي السنه ماتخلص وعقب يستوي خير
    سعيد بس ياروضه لين متى التاجيل عموما انا ابغي راحتج ما بغصبج
    ناصر سعيد ما عليك منها انته متى تبغي قرر وخبرنا روضه ناصر لو سمحت هاي حياتي
    ناصر اشوف لسانج وايد طول
    ابو سعيد بس احن مالنا حشيمه اسمعي ياروضه العرس بيكون عقب اسبوع من نهايه هاي السنه احنا الحينه في شهر 10 والدارسه بتخلص شهر 6 يعني العرس شهر6 اعتقد مالج حجه ثانيه
    روضه ابويه؟ ابو سعيد شو يا روضه؟ روضه: خلاص الي تبونه عن اذنكم بسير الحجره
    سعيد عمي شو بلاها روضه يمكن هيه ماتباني لاتغصبونها على شي هيه ما تباه
    ابو روضه لا يا سعيد لا تقول هالرمسه روضه لك و انتوا محيرين لبعض من زمان وما عندنا بنات يظهرون عن شور هلهم الا اخاف انته غيرت رايك
    سعيد لا ياعمي والله انا ودي اليوم قبل باجر
    بو روضه خلاص عيل بالبركه
    روضه دشت الحجره وهيه اتصيح خلاص حلمها بولد عمها انتهي قلبها الحينه لسالم الغاوي الي انبهرت بكلامه وبشكله بس هيه ما سالت نفسها هل هو فعلا جاد روضه نست اتكفر بوايد اشياء .بس الشي الوحيد الي ما نسته سالم
    يرن موبايل روضه حصه الو روضه فين
    روضه ..... ماترد حصه رويض شو بلاج ردي عليه
    روضه الحقيني يااحصه يبغون يزوجني لسعيد انا ابغي سالم ماقدر اعيش من دونه
    حصه لاه افا انزين عادي خذي سعيد وحبي سالم ها ها ها
    روضه انتي وايد سخيفه تراج حصه الحينه هالساعه بخبر سالم انج زعلانه
    روضه لا لا حرام مابغيه يزعل ويضايج حصه عيني على الحب يلا يلا خليني اتصل بسالم باي
    حصه سكرت واتصلت بسالم حصه: الو سلملم
    سالم سلملمين حيالله حصوه حصه شو اتسوي
    سالم شو اسوي بعد اغاززل حصه الحق روضه من صدقها حبتك وهلها يبغون يزوجونها لولد عمها وهيه ما تبا
    سالم والله وطحتي ياروضه مسكينه اكيد انتي فرحانه ياحصوه
    حصه اكيد روضه طول عمرها الكل يمدحها ويمدح اخلاقها خلهم ايوون ايشووفونها الحينه
    سالم حصه جنج اتغارين منها وايد وتبغينها تستوي شراتج في مستواج الاخلاقي
    حصه عن الغلط انته مب شفتها وعيبتك وقلت انك تباها هكي عندك العب عليها وخذ الي تبا منها ويوم بتشبع فررها مثل الجلبه
    سالم دام انج جي تبين انا حاضر الصراحه روضه وايد حلوه وانا الصراحه ...؟ اظني فاهمتني انتي عطيني رقم الموبايل ويوم بخلص من المغازل بتصل
    مسكينه روضه كانت تعتبر حصه اعز صديقه بس حصه كانت طول حياتها تكره روضه لانها حلوه ومؤدبه وبنت ناس وايد بنات يتمون رضاها وحبها
    روضه يالسه على الشبريه وتترايا حصه تتصل فجاه وصلها مسج من سعيد مكتوب فيه اذوب فيك وانته مهملني والعب على نفسي واقول الحينه بيكلمني
    روضه وايد متفيج هالسخيف انا الحينه براويه طرشت له مسج مكتوب فيه ما يحرك ساكني مثلك بشر ..انته رمشه من عيوني لو تطيح .وش ترى صاحبها لو طاحت خسر لانه سعيد كان فعلا يحبها رد عليها مهما جري منك وصار انا تراني في انتظار صابر على ماهو جرالي اطريك في ليل ونهار
    رن موبايل روضه وشافت رقم غريب ماردت عقب شويه وصل مسج مكتوب فيه اتصل بي تسلم عيونك مايطيق القلب هجرانك الي انتي روح قلبه سالم
    نشت روضه من على الشبريه وقامت اتناقز من الفرحه ومن غير ما اتحس اتصلت ونست تربيه هلها لها نست امها وابوها نست سعيد واتصلت في سالم
    روضه سالم
    سالم روورضه ياا بعد عمري انا
    روضه اتولهت عليك وووايد وايد وايد انته وين عني الحقني سالم هلي بيزوجوني لولد عمي
    سالم خبرتني حصه بس ياروضه انا شو بايدي اسوي
    روضه تعالي اخطبني من ابويه
    سالم بس انتي محيره لسعيد والعرس اتحدد
    روضه انته تعال وانا ببيع الدنيا ومافيها على شانك
    سالم بس ياروضه .
    روضه الظاهر اني كنت مخدوعه فيك انته بس تبغي تتسلى كلكم جي نفس الشي بس تبون تلعبون
    سالم لاه ياروضه انا احبج احبج احبج بس ظروفي ما اتساعدني الحينه
    روضه انا مابغي اي شي لو نسكن في الشارع بس اكون لك وانته لي
    سالم احنا خلينا الحينه نستانس مع بعض اعتبريني انا مثل ريلج وانتي حرمتي ولين يوم العرس الله بيحلها دام انه نحن انحب بعض ماشي بيفرقنا غير الموت
    روضه صدق ياسالم انته عمرك ما راح تتركني
    سالم اكيد وانتي شاكه بهالشي
    روضه انا الحينه برقد وانا مرتاحه وسعيد انا بعرف كيف اطفشه
    سالم وانا وياج ياروضه لو تبغين اي مساعده انا حاضر
    روضه انا ابغي بس حبك و اخلاصك
    سالم يااااولد عيوني انتي لج كل الحب والاخلاص الي في هاي الدنيا

    روضه يلا سالم بسكر عنك انا الحينه الوقت اتاخر
    سالم افااا بعدني ما شبعت منج
    روضه معاليه باجر انشالله
    سالم باجر بمر على حصووه بترراياج براع يلا ياعمري مع السلامه
    ويا اليوم الثاني وسارت روضه الجامعه وهيه مول مسطله تبا ترقد مب من شي من السهر على التليفون
    ريسه رررروويض حبيبتي انتي وين قطعتي مره وحده
    عويش هيه والله صدق الا ويا حصووه السخيفه اربع وعشرين ساعة
    روضه انا هني وبعدين ياعويش حصوه هب سخيفه
    عويش بخبركم برايكم انا عندي كلاس اشوفكم بعدين
    ريسه روضه اشوفج هل الايام وايد متغيره ولا تينا ولا تسالين عنا حصه خذتج منا
    روضه شو خذتني بعد انتوا كلكم ربعي وغالين عليه
    ريسه انتي متاكده انه حصه صدق ربيعتج
    روضه شو قصدج يا ريسه
    ريسه انتي اتعرفين انه حصة سمعتها موول هب زينه والكل يرمس عنها
    روضه الناس شو وراهم غير الرمسه حصة ما بلاها شي
    ريسه لا بلاها انتي اتعرفين انها اكبر مغازلجيه وانها وايد فري وهلها مخلينها على هواها ليش اتخربين سمعتج عشان وحده شراتها
    روضه ريسه انتي اتغارين من حصوه عشانها ويايه حصه ما بلاها شي بعدين عشانها اتحب يعني مغازلجيه
    ريسه روضه شو هاي الرمسه شو تحب ما تحب من متى انتي تفكيرج بهاي الطريقة صدقني يا روضه ان ما ودرتيها لا اخبر امج
    روضه شو يعني اتهددني انتي ما يخصج فيه انا كيفي
    ريسه انا ما يخصني فيج انا ربيعتج وبستوي مرة اخوج مايخصني فيج
    روضه اكبر غلطه في حياتي اني اقنعت امي تاخذج لاخويه يالتني لو اقدر اصلح هالغلطه
    ريسه انتي عمرج ما كنتي جي من متى ترمسين بهاي الطريقه
    روضه اوه مستوتلي الداعووق فكيني من الصدعه يلا يلا برايج
    ريسه ياالله ياروضه الحينه انا استويت صدعه الله يسامحج
    روضه الله لا يسامحني اوكي
    ومشت روضه عن ريسه وريسه واقفه اطالعها والدموع في عينها ليش روضه الانسانه الرائعه وصديقة الطفولة كلمتها بهاي الطريقه شو هالتغير العجيب الي صار فيها ياتري شو السبب
    سارت روضه كلاسها ولبست السير وايلست اترمس روح قلبها سالم
    روح قلبي: انته الدنيا وكل شجوني واغلى شي بعيوني يا حبيبي
    المزيونه هذا كله حقي انا ؟!
    روح قلبي صدقيني الكلام مايعبر عن الي في خاطري
    المزيونه اتصدق متوله عليك في خاطري اشوفك
    روح قلبي: شو رايج اليوم تتاخرين وتخلين الدرويل يسير،وعقب سووي لامج تليفون وقولليها انج بتردين ويا اربيعتج
    المزيونه لالا اخاف ياسالم اذا رديت وياكم حد يشوفوني
    روح قلبي لا اتخافين سيارتي مخفيه وبخلي حصه تيلس ورا وبيتحروني انا الدرويل
    هندي مستعرب ههه
    المزيونه بس ياسالم ماعرف ماجد في حياتي سويتها وركبت ويا ريال غريب
    روح قلبي افا انا غريب لو اتحبيني صدق بتيين اليوم ويا حصه واذا مايتي انسيني احسن لج
    المزيونه لا لا انا احبك وبثبتلك هالشي اترياني اليوم ويا حصه

  5. #5
    صورة الدمعه الحائرة
    الدمعه الحائرة غير متصل صعب اننا نوصفه
    تاريخ التسجيل
    Sep 2007
    الدولة
    اسافر بين البلدان (ما لازم اقول من وين ههههههه)
    المشاركات
    5,799
    Thanks
    0
    شكر 0 مرات في 0 مشاركات
    وين التفاعل؟


    حراااااااااااااااا اااام

    ردوا علي

صفحة 1 من 4 123 ... الأخيرةالأخيرة

كلمات دليلية Tags

جميع ماينشر يمثل الكاتب ولايمثل الموقع والادارة والمشرفين
الدورات التدريبية جامعة نجران
يشرفنا اعجابك على فيس بوك facebook