مشاهدة : 400844
صفحة 1 من 18 12311 ... الأخيرةالأخيرة
النتائج 1 إلى 10 من 180
  1. #1
    يسور غير متصل يحضر الماجستير بالشغب
    تاريخ التسجيل
    Apr 2006
    المشاركات
    831
    Thanks
    0
    شكر 0 مرات في 0 مشاركات





    انا مريت على قصة في منتدى و الصراحة واايد عجبتني




    لان احداثها حقيقية
    صدق الكتابة غير محترفه لاني اللي اعرفه بنت في الثانوية كتبتها لانها نقلتها عن تجربتها الخاصة
    و تشوف اللهجات تتغير من بحريني لسعودي لمصري. بس بصراحة واايد حلووة
    و اي بنت تمر بتجربة الثانوية او راح تمر بالتجربة راح تمر
    راح اتحس روحها متصلة بهالقصة و هي تقراها
    لانها من جد احداثها من واقعنا

    اخليكم مع القصة اللي مو واايد طويلة و انشالله تعجبكم و راح اضيف كل مرة جزء


    الفصل الاول: الماضي و الحاضر
    نورة بنت عمرها 15 سنة. ما يميزها عن باقي البنات هو وجهها. فجمالها ليس كملامح ملكات الجمال. بل انه اجمل. كيف؟؟
    لقد سمعتم بالمقولة "الجمال الداخلي يعكس على الجمال الخارجي"
    فقد اثبتت نورة هذا الشي. هي بنت خجولة و لا تعرف كم هي جميلة. احيانا يخبرها بعض الناس و لكنها تظن انهم يجاملونها.
    هناك مشكلة مضايقتها و ما حبت تقول السبب الحقيقي اللي مضايقها..

    سلوى عمة نورة: شفيك حبيبتي شاللي مضايقك؟؟؟
    نورة: راح ابدا اول يوم في الثانوية بكرة و احس قلبي من الخوف راح ينفجر!
    عمة نورة سلوى: و ليش كل هالخوف حبيبتي مدرستك الجديدة مو مختلفة عن مدارس مصر
    نورة: هذي مو الشي الوحيد اللي يقلقني..امل و هدى يقولون ان المدارس الحكومة الثانوية متروسة مشاكل و بنات يركضون ورى المشاكل!!
    عمة نورة سلوى فتحت عينها على الاخر!
    "بنات يراكضون ورى المشاكل. من وين لهم هالكلام!"
    نورة: مادري يا عمتي المهم. انا بروح انام. بكرة اول يوم مدرسة و ابي اكون نشيطة"
    سلوى: تصبحين على خير حبيبتي
    نورة: و انتي من اهله عمتي.

    نورة بنت درست طول حياتها في مصر. لان ابوها شغله هناك. هي شافت و تعرف كل انواع المصائب. فامها توفت و هي عمرها ثلاث سنين بس. فكل الحنان اللي حصلته كان من ابوها في مصر. بس ابوها لاحظ كيف هي تعيسة من غير ام تنصحها او اخت تجابلها او اي احد يعطيها حنان الام. فقرر ان يرجع بنته بلدها في الخليج لتعيش مع اخته الكبيرة. عمتها اللي حنانها حنانها يغطي على ديرة.
    نورة من النوع الهادئ. ما تكلم احد من غير ما يبدا هو بالكلام. ما تحب تشوف احد في عينه و هو يكلمها. البعض يقول انها طالعة على امها. خجولة و هادئة. و الاخر يراها متاثرة من وفاة امها. فعمتها ما حبت الوضع. فقامت و عرفتها على بنات الجيران. امل و هدى. حبتهم من قلب لانهم اول بنات تعرفت عليهم في حياتها و بدات الشمس في بداية شروقها في حياة نورة..

    غسلت وجها و وقفت تطالع روحها في المنظرة..
    "اول يوم. الله يعيني. الكلام اللي سمعته من البنات خرعني"
    فكرت نورة و هي تناظر روحها في المنظرة
    "انشالله يكون المنهج سهل. هذا اهم شي"
    سلوى: يلا نورة نزلي اكلي الريوق راح تتاخرين عن المدرسة
    نورة: انشالله عمتي اكاني ياية
    لبست نورة قميص اكمامه طويلة و عليه المريول و ربطت حزام المريول بطريقة مرتبة
    لمت شعرها البني الفاتح الطويل بربطة تناسب لون المريول و رشت رشة خنة صغيرة. كان كل شي مرتب و
    ناعم فيها. بس ليلحين كان فيها نوع من الوسواس

    نزلت نورة و هي تركض. حبت عمتها و ركبت السيارة. و بدات تدلي السايق المدرسة. كل ما قربت من المدرسة كل ما قلبها دق اسرع. في مصر كانت تدرس في مدرسة خاصة تمزج فيها الاولاد و البنات و لكن شخصيتها و طبعها عمره ما قربها من اي من الاولاد. و لا حتى البنات. بس بسبب عمتها و تعرفها على هدى و امل. كانت نورة متشوقة للقاء بنات جدد. بس ما تدري شنو راح يصيير لها في هذي المدرسة اللي بتكون لها اول مرة تحط رجلها في مدرسة حكومية في بلدها.

    نزلت من السيارة و هي تناظر يميين و شمال. كانها خايفة من شي. و بدات تمشي بين البنات و هي منزلة راسها. و كل ما ترفعه شوي كل ما تشوفه وجوه بنات. الكثير من الوجوه و كلهم ممسوحين في نظرها لانها ما قادرة تركز. هذي اول مرة تشوف بنات بهالعدد في مكان واحد.

    وقفت نورة في مكانها و هي لامة يدينها و تطالع الارض و الشي الوحيد اللي حابة تسمعه هو جرس بدا الاصطفاف اللي بساعدها من الابتعاد عن الوحدة المشكلة اللي زادت هم نورة هو ميولها المختلف عن ميول اصدقائها هدى و امل. هي تحب الطب و كل ما تتمناه حاليا هو ان تكون طبيبة تعالج الناس و تنقذهم من الموت. من يوم وفاة امها قررت هالشي. مرض امها و وفاتها خلها تحس باهمية معالجة صحة الاخرين فقد دخلت المسار العلمي اما بالنسبة لهدى و امل فهم يرون المسار التجاري انجح هالايام
    كانت نورة واقفة تفكر في هدى و امل.
    و فجاة!!!

    انقطع حبل التفكير بصراخ بنت. بل بنتين
    ظنت نورة بانهم بموتون و حطت يدها على قلبها. بس في الصج طلع انهم فقط فرحانين بشوفة بعض. و ما تم لمة و ما تم بوسة..
    مرة وحدة سمعت نورة وحدة تكلمها من وراها.."اللي يقول ما شايفين بعض من دهر!"
    ضحكت نورة و التفتت وراها لتشوف من كانت تتكلم
    شافت بنت طولها نفس طولها بس كانت ممتلئة شوي و شعرها مربوط بنفس الطريقة بس كان اقصر من شعر نورة اللي يوصل لنهاية ظهرها و البنت كان مبين عليها حبوبة.
    "لا تخافين منهم ترى كل سنة هالبنات يسوون هالحركات حتى لو الكل يدري انهم يشوفون بعض كل يومين في الاجازة"
    وقفت نورة مبتسمة و مستانسة بان وحدة من البنات جات تكلمها.
    " انا اسمي العنود. في صف الثاني الثانوي و انتي مبين على شكلك ان هذي اول سنة لك في المدرسة"
    "هههه. انا نورة و هذي اصلا اول سنة لي في البلد!"
    العنود: من صجك عجل ما تعرفين ولا شي عن مدرستنا و لا احد من البنات
    نورة: اي والله. انا وايد خايفة بان تكون المدرسة على سوء ظني. عندي ربع نفس سني بس مدرستهم تجاري. و سمعت منهم كلام يخوف!
    العنود: كلام يخوف مثل شنو؟
    نورة بصوت واطي: صج في بنات يدخنون سجاير الله يكرمك. في الحمامات من دون ما يعرف احد؟؟!!
    و تطلع العنود ذيك الضحكة العالية. و تقعد نورة تتلفت وهي منصعقة لانها اول مرة تشوف احد يضحك كذا
    العنود و هي تضحك: هاهااااااااي
    العنود: شوفي بقولك حبيبتي. مافي مدرسة في البلد كامل ما فيها مشاكل. و لاني اخاف عليك بقولك ان التدخين اقل شي لازم تخافين منه. في سوالف اخس من كذا..
    نورة: هااااا؟؟! اخس من التدخين شنو هذا اللي اخس من التدخين! و ين المشرفات. وين المديرة عن هالسوالف انا ما فاهمة!
    العنود: و مين قال ان هذي السوالف الكل ينصاد فيها. و المشرفات اصلا يدرون بس مافي في يدهم حيلة. و مافي فايدة بس انتي بتعرفينها و راح تشوفينها جدامك كل يوم. انتي خلك بعيد عنها و راح ترتاحين و تحملي تجربين من بنات لهم هالسوالف. لان ذبحتهم يفروون مخ الوحدة.
    نورة سكتت و هي مفهية!
    نورة: ما فهمت ولا شي من اللي قصدك اي سوالف ذي!
    العنود: يا الله!!!!!
    الله يعينك حبيبتي. انتي بس خلك معاي و راح افهمك اللي تبينه بعدين لان احين وقت الاصطفاف و راح نتاخر.
    ابتسمت نورة للعنود و مشوا ثنتينهم و الجرس كان يدق. وصلت العنود نورة لصفها و خلتها توقف بالاول.
    العنود: اشوفك في الفسحة انشالله.
    نورة: مشكورة على كل شي حبيبتي.
    العنود: هذا واجبي والله
    راحت العنود و تمت نورة واقفة في مكانها و الا تلمح بنت من بعيد خلتها ما تصدق اللي تشوفه. انا اتخيل و لا
    حقيقية اللي اشوفه كيف بنت بهالشكل في المدرسة و ليش؟؟؟

    تتبع القصة مع الفصل الثاني


    الفصل الثاني: اول يوم


    وقفت نورة تناظر البنت من بعيد..
    البنت طولها يمكن ينقال عنه طويل و كان شعرها قصة شعر اولاد و مسوية تسريحة بالجيل و مريولها كان واسع لاخر حد و كانت رافعته لركبها. القميص يد قصيرة بس كافسته و كانه من دون اكمام. الساعة طبعا. ساعة رجالية و الجوتي رياضي كانه جوتي اولاد و نظارة سودة خاشة شكل عينها.
    الا تشوف نورة البنتين اللي كانوا يصارخون جايين لتلك البنت و قامت البنت و اخذت احد البنتين و لمتها ليما ارفعتها عن الارض و البنت الثانية تطالعهم و تضحك.
    نورة ما فهمت اللي يصير امامها. بس طبعا هي مو من النوع اللي تحب الشماتة فقامت و لفت وجها و وقفت عدل للنشيد الوطني.

    من بعد ما خلص الاصطفاف ركبت نورة الدرج مع باقي بنات صفها و معلمتهم اللي تشرف على الصف. كل البنات كانوا مبتسمين و يسالفون و مافي في قلبهم شي غير السوالف اللي منحوتة عليه اما نورة كانت خايفة و مرتبكة. صج البنات هذا اول يوم لهم في المدرسة كمان بس هم يعرفون بعض من المرحلة الاعدادية و حتى اللي ما كانوا مقربين تقربوا لان الانسان معروف عنه من بين الغريبين يرتاح للشخص اللي شايف وجهه و معتاد يشوفه.
    البنات دخلوا الصف و نورة وقفت برع جنب الباب و هي تطالع البنات و هم يجلسون على كراسيهم و اللي زاد ارتباك نورة هو سماعها لازعاج البنات و هم يسالفون. فهي ما كانت تفهم اللي يقولونه بس اللي تسمعه كان خرابيط ما تنفهم و كلام ملخبط. مرة وحدة راح التلخبط عن مخ نورة يوم سمعت..
    "ليش واقفة عند الباب دخلي داخل الصف!"
    قحصت نورة لما سمعت صوت معلمتهم وداد. اللي يبين عليها من النوع الشديد
    نورة: انشالله

    دخلت نورة الصف و هي تمشي بكل هدوء و خفة. بعض البنات وقفوا سوالفهم و قعدوا يطالعونها بنظرات. بس هي مشت و قعدت على كرسي فاضي في ثالث صفة.
    و هي تطالع جدامها و ما تكلم احد.
    معلمة وداد: سكووووت يا بنات. ووه كل سوالف الصيف طلعت احين و شسالفة الفسحة عجل!
    وحدة من البنات صرخت و هي في محلها: للاكل. هههه!
    وقاموا البنات يتضحكون على ردها
    معلمة وداد: واايد حلو. و انا اللي راح ادرسكم عربي فاحسن لك تتادبي و ما تردين بهالاسلوب لان السلوك له 10 درجات و اهم من المشاركة عندي.
    سكتت البنت و هي تطالع الارض. ما توقعت ردت فعل المعلمة راح تكون كذا..
    رن الجرس و طلعت المعلمة و دخلت معلمة الحصة الاولى من بعدها و وراها بنتين حاملين الكتب للمادة و كانت وحدة من هالبنتين تلك البنت اللي شكلها مسترجلة..
    المعلمة: مشكورين يا بنات ما قصرتوا
    البنت المسترجلة: تامرين على اي شي ثاني. حاضرين لك والله
    كانت تكلم المعلمة و صوتها خشن و مبين عليه انها مدفشته عمدا و طريقة كلامها طريقة كلام الاولاد و حتى الوقفة و تعابير الوجه
    المعلمة طالعت هذي البنت و ردت عليها
    "ابيك تروحين الصف بدال هالدوارة في المدرسة. ترى انتي مو في مجمع عشان تفتريين!"
    البنت: هههههه. لا انشالله عشان عيونك بس والله راح اروح الصف..
    نورة تطالع البنت و هي مو مصدقة انها بنت في الاساس!
    نورة: هذي مو بنت. هذا ولد!
    هذي اللي كانت تفكر فيه نورة في تلك اللحظة..
    مشت البنت المسترجلة و قبل ما تطلع من الصف المحت نورة و هي جالسة و نورة من غير قصد كانت للحين تناظرها. فقامت البنت تبتسم لها و مبين عليها منبهرة من شكل نورة اللي يجذب.
    استغربت نورة من نظرات البنت لها. ليش تطالعها بهالطريقة و كانها ولد شايف بنت!
    قحصت نورة من تفكيرها لما حذفت وحدة من البنات الكتاب على طاولتها!
    نورة: شكرا
    ما ردت عليها البنت و مشت عنها.
    خلصت اول ثلاث حصص و كان وقت الفسحة. كانت حاسة روحها هلكانة..
    كل البنات قاموا من اماكنهم و خرجوا برع الصف بس هي تمت في مكانها لانها ما تعرف وين تروح في المدرسة..
    مرة وحدة دخلت العنود الصف و راحت عند نورة..
    العنود: هاااا انتي. كيف حابة المدرسة؟
    نورة: والله شاقول لك. من بعد ما شفت الكتب و الجدول اليومي للمواد. تعبت نفسيتي. حتى المعلمات ما يريحون البال!
    العنود: اكيد لازم كل شي في الثانوية غير. المعلمات متشددين اكثر. المواد اصعب بوااايد. و حتى التعب و الجهد لازم يكون "دابل" اللي انتي كنتي تسوينه في الاعدادي و البنات اشكال و انواع على كيف كيفك!
    نورة كان بيغمى عليها من كلام العنود. ما صدقت ان الثانوية بهالشكل!
    نورة: بصراحة. ما توقعت المدرسة كذا!
    العنود: والله راح تعتادين عليها. المهم امشي معاي برع الصف. ادري اذا ما طلعتي راح تتعقدين اكثر
    نورة و هي قايمة من مكانها: و مين قال اني معقدة؟؟؟!!!
    العنود: ويييييي اسفة غلطنا في القران. يلا سموحة
    نورة و هي تضحك: اوكيي
    خذت العنود نورة و راحوا يتمشون في ساحة المدرسة. بعض البنات كانوا يطالعون نورة بنظرات ما كانت قادرة تفسرها. كانوا البنات اكثريتهم مكحلين العينين من الزين. و الشعر استشوار و اللي مسرحته بالجيل و التراشي توصل للكتف. و نورة طبعا ما يدش مخها هالشي. بنات في مدرسة و شكلهم رايحيين عرس!..
    نورة: العنود ممكن اسالك شي؟
    العنود: سالي حبيبتي
    نورة: كيف البنات متعدلين من الزين و يتمشون في المدرسة من غير ما تقولهم شي الادارة خبري هالاشياء ممنوعة!
    العنود: حبيبتي هذي الشي سالفته من تحت لتحت
    نورة: هاااا؟؟! ما فهمت!
    العنود: يعني الاداريات يدرون ان في هالشي في المدرسة بس يسمعون عنه و ما يشوفون البنات بعينهم.
    نورة: و كيف ما يشوفونهم؟؟
    العنود: البنات في الفسحة و اي وقت المعلمات و الاداريات غير متواجدين تشوفينهم كذا متعدلين. بس وقت وجود الاداريات و المعلمات يقومون باسرع ما يمكن يمسحون الكحل و يخشون التراشي في جيوبهم
    نورة: صج!!!!
    العنود: اي صج. انت كيف توك تدرين عن كل هالاشياء من وين طالعة انتي؟!
    نورة: هههه. لا بس انا شخصيتي مو اجتماعية لهالحد. يعني ما عندي احد مثلك فاهم و يفهمني.
    العنود: هاااا اقوول ليش..

    مرة وحدة كورة سلة بكل سرعة تمر من جدام نورة و العنود و بكل قوة تضرب الطوف..
    و من الخوف طلعت نورة صرخة صغيرة.
    الا ما تشوف الا تلك البنت المسترجلة تركض من جدامها و تاخذ الكرة من الارض و وقفت جدام نورة و ابتسامة على وجها و هي تقول: مسامحة يالحلوة..
    نورة ما ردت عليها. بس سكتت و البنت ردت للبنات اللي نفس شكلها تقريبا ليكملوا اللعب.
    نورة ما كانت مستوعبة باللي صار.
    العنود: اسمها مريم و هي في التوجيهي
    نورة: شنو؟؟
    العنود: البنت اللي خذت الكورة توها. اسمها مريم
    نورة: اها..
    العنود: ما بتساليني ليش شكلها كذا؟
    نورة: هااا. ليش اسالك هالسؤال؟!
    العنود: توقعتك تستغربي من شكلها. و تساليني سؤال عنها
    توها كانت نورة تبي تقول للعنود شي و الا الجرس يرن و ابتدت الحصة الرابعة
    العنود: بييييييه علينا معلمة وداد راح تذبحني اذا تاخرت. اشوفك في الهدة نورة. يلا بااي!
    و دبيج للصف و نورة واقفة تطالعها و هي تتضحك
    التفتت نورة و الا مريم تطالعها من بعيد. ما سوت شي نورة بس مشت على الصف عشان ما تتاخر و مريم خذت الكورة و مشت بعد.

    انتظروا الجزء الثالث الحقيقة والالم


    الفصل الثالث: الحقيقية و الالم

    دق جرس الهدة و نورة قامت تجمع الكتب الدراسية الجديدة و يوم رفعت راسها الا تشوف العنود واقفة عند الباب ناطرتها. قاموا يتمشون مع يعض لبوابة المدرسة اللي كانت زحمة من البنات عنده. و الا تحس نورة دزة قوية تجي في بطنها. ما تشوف الا مريم و بنتين نفس شكلها او ستايلها يدزون البنات بكل قوة عشان يمرون بكل سرعة.
    العنود: شفيهم هالبنات عزبالهم ريشة على راسهم عشان يدزونا بهالطريقة!
    سكتت نورة و وجها مبين عليه نوع من الاستياء بس في نفس الوقت الاستغراب
    طلعوا نورة و العنود من زحمة البنات لزحمة السيارات اللي واقفة عند المدرسة.

    العنود: مين بجيك في الهدة و لا تبين اوصلك؟
    نورة و ابتسامة عريضة على وجها: لا والله سايق بيت عمتي احين بجيني
    العنود: انزين عيل نشوفك بكرة و تحملي بنفسك
    نورة: مع السلامة
    وقفت نورة عند بوابة المدرسة و هي ناطرة السايق يوصل
    نورة في قلبها افف الجو وايد حار ليش تاخر علي!
    التفتت نورة و الا تشوف مريم و ربعها يركبون سيارة كروزر سودة و مريبنة كامل. كانت السيارة لمريم الظاهر لان هي كانت تسوقها...
    مرت السيارة من جنب مريم ببطء و قامت مريم و نزلت الجامة و طالعت نورة..
    ما فهمت نورة ليش كانت تطالعها فنظارتها السودة بروحها خشت نص ملامح وجها..
    سكرت الجامة و مشت السيارة. بل بالاصح شخطتها..

    وصلت نورة البيت و هي تعبانة على الاخر. دخلت المطبخ و الا عمتها سلوى جالسة تقطع الخضروات للسلطة
    نورة: السلام عليكم
    سلوى: و عليكم السلام و رحمة الله و بركاته
    و استمرت بتقطيع الخضروات
    قامت نورة و جلست و حطت يدها على خدها و هي تطالع الجزر و الخيار اللي مجابلها
    عمتها استغربت. ليش جالسة كذا نورة
    سلوى: شفيك حبيبتي عسى ما شر؟
    نورة: لا ولا شي عمتي. هذا اول يوم و شوي تعبانة. استاذنك بروح انام شوي
    سلوى: شنووو؟ تنامين هالحزة و الغدا حق مين مسويته انشالله؟؟!
    نورة: حطيلي الغدا و اذا قمت من النوم راح اكله
    سلوى: على راحتك حبيبتي

    خذت نورة كتبها و حذفتهم على السرير. خذت دوش سريع و لبست ثياب مريحة
    انسدحت على السرير و بدات تقرا اول 5 صفحات من كل كتاب عشان تكون عندها فكرة عن خلفية كل كتاب و عن شنو راح تدرس.

    حطت الكتب حسب جدولها لليوم التالي و باقي الكتب في الدرج.
    ما يميز نورة بعد انها بنت تحب الترتيب و التنظيم و ما تحب شي يكون برع اطار الحياة الطبيعية للشخص. مثل امها بالضبط.
    قبل ما ترد نورة الدرج لاحظت صورة في الدرج. قامت طلعتها من الدرج و جلست على طرف السرير تطالعها.
    و الا دمعة تنزل على خدها. الصورة اللي في ايدها. صورة امها اللي توفت و هي حاملتها.
    مرة وحدة حست نورة وخزة في قلبها. و كانها تشوف شبح امها جدامها و مو صورة
    تشوف كيف امها فرحة و هي حاملتها و كيف هي مبتسمة من قلبها.

    جلست نورة في مكانها و هي تتذكر كل اللي صار قبل يومين و اللي خلاها متضايقة لليوم .
    كانت الساعة 4 العصر و نورة كانت جالسة في الصالة مع عمتها و الا جرس البيت يرن
    قامت الخدامة و فتحت الباب. و دخلت المراة اللي كانت واقفة عند الباب
    سمعوا نورة و عمتها صوتها و هي تقول: السلام عليكم
    ردوا عليها: و عليكم السلام
    وقفت المراة و هي تطالع نورة. "انتي نورة؟"..
    نورة: اي نعم انا نورة..
    المراة: عرفتيني؟
    نورة: لا والله. من تكونين؟
    "ما الومك. اخر مرة شفتك كان عمرك اقل من سنة و من بعدها انتقلتوا لمصر و ما سمعنا عنك شي"
    قالت و هي تشوف نورة. عمة نورة كانت مستغربة من كلامها..
    سلوى: لو سمحتي ممكن تقولين لنا من انتي؟
    "انا منيرة. عمة امك الله يرحمها يا نورة"
    سكتت نورة و طالعتها بنظرات تفاجئ
    نورة: صج؟ انتي عمة امي؟؟
    منيرة: اي انا هي. و لما عرفت انك تعيشين هنا. قلت لازم اشوفك
    سلوى: حياك الله في اي وقت
    منيرة: الله يحييك
    خذت منيرة يد نورة و هي تطالعها و هي فرحانة
    منيرة: ماشالله عليك. كبرتي و صرتي مراة..
    ضحكت نورة بخجل و نقلب وجها الوان
    منيرة: انتي بصراحة نسخة من امك..
    نورة: كل من يقول لي هالكلام. بس انا اشوف ان امي كانت اجمل مني بوايد
    منيرة: هههه لا والله الشبه بينكم هايل. كانك سارة امك واقفة جدامي!
    نورة ابتسمت ابتسامة عريضة..
    سلوى: حياك استريحي. نورة قومي جيبي قهوة بسرعة

    قامت نورة بسرعة لداخل المطبخ و هي ميتة من الوناسة بالكلام اللي سمعته من عمة امها. رتبت كل شي في الصينية و حملتها. توها تبي تحط رجلها في الصالة. بس سمعت كلام خلها واقفة في مكانها جنب المطبخ..
    منيرة: انا لما سمعت ان ابو نورة تخلى عنها و جابها عندك. قلت لازم اجيك و اشوفها المسكينة!
    سلوى: ابو نورة ما تخلى عنها. هو جابها عندي لانه مشغول واايد في شغله في مصر. و جابها عندي عشان احسسها بالحنان اللي ناقصها من امها..
    منيرة: انا اللي سمعته انه قرر يرجعها بلدها في هالعمر لانه ما يعرف كيف يربيها في هالسن
    سلوى: سمعتي و من وين سمعتي؟
    منيرة: الناس تتكلم و الحيطان تسمع. و الكلام ينتشر.
    سلوى: ما يهم شنو الناس تقول. انا متاكدة ان اخوي ما يمكن ان يتخلى عنها. فهي بنته الوحيدة.
    منيرة: هو انا اللي ابي اتطمن عليه حالة نورة من بعد ما سمعت الخبر. انا لما سمعته من جيرانا اللي اختها تعيش في الشقة اللي مجابلة شقة اخوك. ما صدقت!
    سلوى: انا ليلحين ما قررت اقولها..
    منيرة: و متى مقررة تقولين لها انشالله العرس بعد اسبوع و لازم تدري
    نورة بدات نظرات الشكوك على وجها. عرس مين اللي يتكلمون عنه؟
    منيرة: انا اللي معور قلبي هو كلام الناس اللي يقول ان ابوها طرشها بلدها عشان يتزوج و يكون له عايلة جديدة في مصر من دونها.

    نورة لما سمعت هالجملة. كانها شايفة جن مار من جدامها. من غير ما تحس طاحت الصينية من يدها و انكسروا الفناييل و انكبت القهوة على الارض لما سمعوا صوت طيحة الصينية من يدها. اركضت عمتها لتشوف شصار.
    سلوى: نورة ايش صار لك؟
    نورة بصوت متقطع و عينها في الارض: مادري مادري
    سلوى: نورة شصاير؟
    نورة: ما صاير شي. باروح داري شوي فيني عوار راس..
    ركضت نورة لدارها و قفلت الباب و جلست على طرف السرير و هي تبكي
    و هذي نفس حالتها اليوم. حطت نورة راسها على الوسادة و الدموع ليلحين تنزل من عينها. صكت عينها و غصبت نفسها انها تنام عشان تنسى باللي صار و فعلا غطت عينها.

    قحصت نورة من النوم لما سمعت طرق عمتها على بابها
    سلوى: نورة قومي فتحي الباب. هدى تبيك على التلفون
    نورة و هي تمسح دموعها: انشالله عمتي
    قامت نورة و انزلت تحت في المجلس وردت على التلفون من هناك
    نورة: الووو
    هدى:هلااااا والله بنورة اللي نورنا صوتها
    نورة: هلا بيك
    هدى: شفيك. صوتك متغير. صاير شي؟
    نورة: لا بس كنت نايمة و توها قومتني عمتي
    هدى:باااااال. راقدة لهالحزة!
    نورة: ليش الساعة كم احين؟
    هدى: الساعة 7 مساءا بتوقيت بيتنا. هههه. تعالي كيف المدرسة؟
    نورة: والله مادري شنو اقولك هدوي. فيها الزين و الشين
    هدى: كل المدارس كذا. انا و امل ياتنا لوعة من المنهج. بس حمد الله البنات حليوين و حتى المعلمات
    نورة: الحمد الله..
    هدى: المهم يا قمر. انا لازم اروح احضر لدروس لبكرة و انتي سوي نفس الشي
    نورة: انا حضرت قبل ما انام
    هدى: ويييي. اشوف الشطارة زايدة
    نورة: ههههه شنسوي بعد. يلا حبيبتي نشوفك على خير. سلمي على امل وايد
    هدى: وصل. يلا بااااي

    سكرت نورة الخط و قلبها مرتاح شوي. لان سماعها لصوت هدى ريح بالها..
    نورة و هي تفكر: بصراحة نفسيتي تعبانة. كيف بروح المدرسة بكرة. والله ما اعرف ليش ما اتشجع اقول لهدى اللي في قلبي. فهي اقرب مني فهما و سنا. والله خاطري اقول لها بس احسها ما راح تفهم. ولا احد يقدر يفهمني. احس نفسي وحيدة حتى لو عندي من يحبني حوليني. يا رب سهل علي الامور..

    رجعت نورة غرفتها و خذت صورة امها وحطتها تحت الوسادة. و ردت نامت عشان تكون قادرة تقوم و نفسيتها احسن للمدرسة..
    مرة وحدة جات على بالها مريم. تلك اللي تطالعها بنظرات غريبة.
    نورة: انا ليش افكر فيها. بس نظراتها غريبة لي و ما قادرة انساها و ودي اعرف شنو قصدها. و انا اول ما شفتها استغربت ان في بنت ترضى بان يشوفها الناس بهالشكل. كولد و انها ترضى تتخلى عن كامل انوثتها راح اسال العنود بكرة و انشالله احصل اجوبة اسالتي من عندها.
    طفت نورة الليت و نامت و بكرة يوم جديد في المدرسة.


    يتبع مع الفصل الرابع: البداية مع مريم


    (اطلب من كل من قراها انو يتابعها للاخر لانو القصه مرره تجنن)

  2. #2
    q6waaa غير متصل طالب ابتدائي
    تاريخ التسجيل
    Dec 2007
    المشاركات
    63
    Thanks
    0
    شكر 0 مرات في 0 مشاركات
    وينهااااااا القصه حراااااااااااام
    كملوها

  3. #3
    الحب بلوة غير متصل جاي معه ملفه
    تاريخ التسجيل
    Nov 2007
    المشاركات
    1
    Thanks
    0
    شكر 0 مرات في 0 مشاركات
    بليز كمليها

  4. #4
    صورة الشرس بطبعه
    الشرس بطبعه غير متصل طالب ابتدائي
    تاريخ التسجيل
    Jul 2007
    الدولة
    ساكــن في ايطاليا احم احم ^-^
    المشاركات
    142
    Thanks
    0
    شكر 0 مرات في 0 مشاركات
    يلا كمليها

  5. #5
    صورة الفيلسوف 15
    الفيلسوف 15 غير متصل يطلع بدون استئذان
    تاريخ التسجيل
    Aug 2007
    الدولة
    السعودية
    المشاركات
    376
    Thanks
    0
    شكر 0 مرات في 0 مشاركات
    اين التكملة

    قصة رائعة

  6. #6
    صورة احــلى امــاراتــي
    احــلى امــاراتــي غير متصل طالب ابتدائي
    تاريخ التسجيل
    Dec 2007
    الدولة
    دار زايــد
    المشاركات
    81
    Thanks
    0
    شكر 0 مرات في 0 مشاركات
    وين تكمله

    الصراحه القصه وااااايد روعه

  7. #7
    صورة sntooop
    sntooop غير متصل يمون على المشاغبين والمشاغبات
    تاريخ التسجيل
    Sep 2007
    الدولة
    ≡≡ķ•§•å≡≡
    المشاركات
    1,761
    Thanks
    0
    شكر 0 مرات في 0 مشاركات
    وين تكمله

    الصراحه القصه وااااايد روعه

  8. #8
    صورة أنوار العين
    أنوار العين غير متصل طالب ابتدائي
    تاريخ التسجيل
    Dec 2007
    الدولة
    في أرض الله الواااااسعة
    المشاركات
    61
    Thanks
    0
    شكر 0 مرات في 0 مشاركات
    (اطلب من كل من قراها انو يتابعها للاخر لانو القصه مرره تجنن)

    انت بس كمليها ومايصير الا اللي بخاطرك ماعليك احنا متابعين للاخر

    بس لا طولين علينا ترى منتظريييييييين

    بلييييييز

  9. #9
    صورة dalooo3ah
    dalooo3ah غير متصل طالب ابتدائي
    تاريخ التسجيل
    May 2007
    المشاركات
    64
    Thanks
    0
    شكر 0 مرات في 0 مشاركات
    واااوالقصه تهبل

    وارجوا من الكاتبه انها تكملها

  10. #10
    صورة احــلى امــاراتــي
    احــلى امــاراتــي غير متصل طالب ابتدائي
    تاريخ التسجيل
    Dec 2007
    الدولة
    دار زايــد
    المشاركات
    81
    Thanks
    0
    شكر 0 مرات في 0 مشاركات
    وين القصه ؟؟؟؟؟؟؟؟؟؟؟؟؟؟؟؟؟؟؟؟؟؟؟ ظظ

صفحة 1 من 18 12311 ... الأخيرةالأخيرة
الدورات التدريبية جامعة نجرانبنات السعودية
يشرفنا اعجابك على فيس بوك facebook