مشاهدة : 6066
صفحة 1 من 3 123 الأخيرةالأخيرة
النتائج 1 إلى 5 من 14
  1. #1
    حميدان زائر


    سلاااااام عليكم حبايبي
    والله انا عن جد اليوم وانا متغدي وعقب الغدا متسلقي على هلافراش طار عني النووم
    اتقلب واتقلب بس مااش
    ومير تقوم هالافكار تلعب بي)
    قمت اتذكر ايام الطفوله
    صراحه اني اقوول ان الجيل الجيد اللي عقبنا مسااكين
    جيل الستايشن وما ادراك مالستيشن
    صحيح انا مننا كابر بالحيل هه نطقطق ال 25 تونا

    المهم زبده السالفه ولاتعطونني وجه ترى امهدكم للفجر سواليف والله:
    اييه
    هذا ياحباايبي طرا على بالي العابنا قديما وهوااياتنا
    وابعدد عليكم وحده وحده وشركاائي فيهن
    بسم الله
    اولا
    هوايه تربيه الحبيب خليتها اول وحده عشان تقولون وش هالرومنسي
    اللااااااه والاساامي
    المسرول
    وابو قبوعه
    والمقنعز
    واللوت
    وقلابي
    وشمسي
    وكان زميل المهنه في هذه الهوايه ولد خالتي ادامه الله لي
    ااااه مسلسل السرقات الذي كان لم ينتهي الا بانقراض حمامنا وتركنا هذه الهوايه
    ثانيا:
    رمي البرصي او البريعصي كما نسميه نحن)
    الااااه وهذه الهوايه اتتنا عقب ماشرا لنا الوالد الله يبيحه ويرحمه صتميه صينييه:
    وهاااااااات لدرجه انه اصاب البراعص في كافه المنطقه حاله انقرااض لو لا ان رحمهن الله بتعطل البندق ولا لقينا احد يصلحها:
    بس للحين قااااااهرني ملعوووون الوالدين
    البريعصي الكبير اللي في المزرعه عجزت انا ولد الخاله عنه
    وللحين حي:
    ثاالثا:
    السياكل القواري)
    وهذه من الهواااياات التي ابدعنا بها وبفنوونها
    والله كني اذكر الرجال اللي في بالي وهو دايم سرواله متقق واسود من الشحوم حقات السيكل
    ومن حسناتنا التي اخترعناهااا وعمت فائدتها ارجاء الجزيره العربيه هي البريك اليدوي
    تدرون السياكل بركاتهن ضعيفه ولا ينفعن وقت الشده
    لذلك جب لك نعل زبيريه الله يكرمكم وحط في قاعدتها كم رصه لستك من حقات السقوس وان بغيت تفرمل ماعليك الا ان تحط رجلك على التاير الخلفي
    لاااا وتقدر تسحب جلنطاات بعد فيها
    وقمنا بعد بفتح ورشه لتصليح السياكل الا ان هذه الورشه تعرضت للاغلاق من قبل البلدين نظرا لاننا نافسنا الشركات الكبرى في هذا المجال
    راابعا:
    الجح الرقي)
    ليس لمقصووود زراعه الجح
    لاا ولكن السطو عليه
    هههههههههههه
    لم نكن والله نسطو عليه من قلله ولاكنها الشقاوه الزائده
    لدرجه ان احد الشباب كان يسطو معنا ليلاا على مزرعه والده
    هو صحيح دلخ شو ي بس معليش
    وهذي الهوايه بعد فوحان ريحتها صار اهل المزراع يلبدون لنا
    وااذكر نم المواقف الطريفه ان عندما كننا وسط الرشاش وكل واحد ماسك له حجه ولعت لمبه الرشاش ووالله ولبد تدروون وين
    وسط جره تواير الرشاش وكلها ماااااااء
    ونصيح عليه مامن احد بس لمبه الرشاش ويقووم لا اولله الطين لاطخه لطخ
    هههههههههه الله يذكره بالخير ابو منار



    احبائي اتمنى ان لا اطيل عليكم وان كنت نويت ان اقسم هذا المقال لجزاين لاكن قد تسعفني الذاكره في بعضا من الهوايات الاخرى التي نسيتها
    اتمنى ان تكون هواياااتكم مفيده مهو مثل هوايتي
    والاااااان
    ماهي هواااايااتكم؟؟؟؟؟؟؟؟؟؟ ؟؟؟؟؟؟
    اخيكم
    حميدان فتي الميدان)

  2. #2
    أبو خالد غير متصل يطلع بدون استئذان
    تاريخ التسجيل
    May 2001
    الدولة
    الرياض
    المشاركات
    292
    Thanks
    0
    شكر 0 مرات في 0 مشاركات
    الله يقطع بليسك يا شيخ

    والله ذكرتنا بايام منول اييييييييييييه الله مستعان

    معليش بروح اجيب مناديل وارجع ..............

    يخوي قعدت امس دموعي يوم جلست اتذكر ذيك الايام ايام الهبال والشعر المخنفس على بالنا انها هي الموضه

    من ذيك الذكريات اننا مرة من المراريت رحنا نبي نسرق جح على قولك رقي المهم دخلنا ذاك المطق مزرعة بلغة الاولين ونتدير ندور لنا جح وحملنا لنا اللي نقدر عليه اللي نحتاجه واللي ما نحتاج له بس فساد
    لا والضحكه وشي ان الهنود درو عنا وصكو باب المزرعة بس على مين يا بابا خوينا بايعها خلى صفقة الباب نثر في كل شنق ولا خافو ذالهنود قامو يلحقونا وردينا عليهم بالحرب النوويه قمنا نرجم عليهم من الجح اللي معنا يعني انواع الطغى

    ومن المواقف الثانية
    الحن دايم نطلع نصيد جرابيع طبعا كل واحد يعرف الجرابيع
    ومن المواقف الطريفه اللي حصلت وقت التصييد

    فيه واحد من الشباب طب من السيارة الحوض يبي يلحق على الجربوع المهم لحقه والحن ضيعناه لانكم زي منتو عارفين ان الجرابيع ما تنفع تصيدها الا في اول ايام الشهر او اخره يعني علشان ما يصير فيه نور

    نرجع للموضوع خوينا ضيعناه وجلسنا ندوره تدرون وش سوى

    شب في شماغه وجلس يطوح به علشان نشوفه

    حسيت اني طولت عليكم شوي ولا

    اكرر شكري لك اخوي حميدان على طرحك الالبوم عفوا الموضوع هذا
    تحياتي ابو خالد

  3. #3
    الحسام غير متصل طالب متوسط
    تاريخ التسجيل
    May 2001
    الدولة
    السعودية _ الرياض
    العمر
    43
    المشاركات
    242
    Thanks
    0
    شكر 0 مرات في 0 مشاركات


    الله يقطع شيطانك ياحميدان ذكرتني بالطفوله وايامها الحلوه بس مو كلها حلوه بس والله انا ماكنا نحس بالملل ولايعرف لنا طريق بس فيه بعض الهوايات الهامه قد تكون غابت عن بالك واحب او اورد منها هوايه التزحلق على الرمال الطعوس وكذلك صيد الضبان والجرابيع .الخ........ اشكرك على هالطرح الجيد وارجو ان يكون للموضوع بقيه عن ذكريات الطفوله وايام الشقاوه والله يعطيك العافيه

  4. #4
    حميدان زائر
    اخوي ابو خالد ادام الله لك خالد واهله
    والله انك صاادص قبل والله اني اذكر اول مانزل كميوتر صخر
    يووووووه شي شي
    تقول جاينا كمبيوترات ناسا كلها
    بس والله ان هكلايام احسن من هالنت والكمبيوتر وعصر العولمه
    الا اقووووول الهندي اللي فضخت عينه يوم ترميه ببطل الماء وش سوى يوم شكى على ابوك؟؟؟؟؟؟؟
    -==========
    الحساااااااااااااا ام
    والله اني فرحت يوم رحعت من رحلتلك الميموونه وين الناس ياعم

    بس تدري وش راااااسخ في مخي؟؟
    تذكر الرصاصه حقة البلديه يوم يسرقونها فريق عويسه يرصصون الملعب؟؟؟
    هههههههههههاي
    اوالا الكهرباائي حق الفريق ابو تحسين
    يمدد الكهرباء من الظغط العالي
    والله ماضيع ميزاينه الدوله غير انتم)


    == ولكم العديد من الهوايااات بس مو الحين اخليهن جزئ ثااااني

  5. #5
    ناصر غير متصل طالب ثانوي
    تاريخ التسجيل
    May 2001
    المشاركات
    557
    Thanks
    0
    شكر 0 مرات في 0 مشاركات
    اااااه يا ايام الطفووله ..

    الا ليت الصبا يعود يوما === فاخبره بما فعل الشباب

    ههههههههههههههههه هههههه
    يا زين هواياتك يا حميدان انت والاخوان اللي هنا يوم انكم صغار .

    اما انا طفولتي ما كانت بعيده عن طفولتكم رغم وجود بعض الاختلاف
    بالاضافه الى ما ذكرتوا من هوايات اول شي السياكل والله يا مرت علي ايام مع السياكل هههههه اثارها موجوده علي الى الان والله من طيحة طحت فيها على خشتي ومن زبرة جيت مسسرع ابطمرها مثل اللي في التلفزيوون هههههه وجيت على وجهي وسيكلي على ظهري هههههه يووووه يالربع والله يا موقف صارلي مع السياكل ما انساه طوول عمري

    طبعا قبل ما كان عندنا قار يعني زفلت ما شاء الله الاراضي اللي حولنا كلها براان ومتعودين على سياقة السياكل في البران ومره في الاجازة الصيفيه سافرنا لديرة من الديار وكانت متطووره ذيك الديره وعيال عمي كلهم عندهم سياكل المهم والله وانا اخذ سيكل واحد منهم ونطلع انا ويا اقرد واحد فيهم ويوم جربت السيكل على القار لا والله يوم جازلي يا ولد من يوم تعطيه يجاوب معك ما هو مثل ديرتنا كلها رمل وغراز وتعقيد المهم والله وانا ادز واروح عنه واخليه وهو وراي طبعا فيه سيارات وهو يولع الماخوذ انقهر عشاني سبقته وهو يقعد يحدني وانا خايف من السيارات يالربع والله بغى ينفضخ قلبي هاك اليوم قلت يا ولد افتك منه ومن شرره لا يحدك هلحين وتوطاك السيارات خله يرووح بس والله وانا امسك يمين الخط وافتح له الطريق اثر الماخوذ نيته شينه ناويني بالشر يوم انه طافني وهو يلف علي وتايره الخلفي يضرب تاير سيكلي الامامي . توقعوا وش صار ؟ هههههه جيت مجااااوب على خشتي يوووه وانواع الجرووح وانواع الدماان هههههه واقولكم ولا تعلمون احد انواع الدمووع المخلوطه بالحقد والقهر والتهديد والله ماخليك والله لاعلم عمي عليك ومن هالسوالف تخيلوا شكلي وانا جالس في الشارع وماسكن ركبتي ودماني مالية وجهي واهدده المهم وقفت السيارات ونقلوني للمستشفى وانواع اللفات على جسمي هههههه وبعدها قلت وا حلالاه يالبراان حقت ديرتنا بس تجي مجاوب على خشتك واكثر ما يجيك انك تقوم ووجهك مغبر بس ; ههههههه وتبت ماعاد اركب سيكل على القار .

    ايه وعقب السياكل عقلنا شوي وجت هواية الحمام وتربيته يووه انواع الحمام والالوان كانت عندي يالربع سطح بيتنا تبروا منه اهلي وانواع التطير والتصفيق ومن نظره وحده اعرف الذكر من الانثى لا عاد واصحاب الخبره يمسكوونه الحمامه مع منقارها هههههههههههه الله يرجك حميدان ..

    وعقب الحمام جت هواية متابعة المسلسلات الكرتونيه واصبحت افضل مشاهدتها وحتى الان ومنها سالي سنان الغابة الخضراء عدنان ولينا الليث الابيض فتى الادغال ماوكلي غراندايزر فلونه واخوها جاك فارس الفتى الشجاع يصبح البطل يووه لا نسيت اهم شي جزيرة الكنز .. وغيرها كثيرر بس ناسيها هلحين .هههه
    ومن الافلام اقدر شي اسمه الرجل الاخضر والسيارة السوداء العجيبه وبوسي الكلب الوفي الله يعزكم وذيك الايام كنت اتابع من سيربح المليوون اخخخخ امزح .

    وبعدها تطورنا شوي وصرنا نطالع للسيارات كل واحد منا معه ددسن 82 ولا 85 وبس لا تدور غيرهن وتعالوا شووفوا انواع التحديات والراليات والسباقات وكلن يضبط موتره والله العظيم كنا نصرف عليهن مصاريف والله توصل لقيمة سيارة جديده وحنا ما ندري اهم شي الكفرات خط والبوري طط والمسجل ترررري لا وجت موضة التنزيل سحب السست وعشنا ايامنا معها والكبووس حقت الدوريات والتوانك والشنطه وعقبها وصلتنا جنوط الكرووم هههههههههه انوواع العربجه لا وتعالوا شوفوا كيف نسووق عاد حنا قصار وقتها لانا صغيرين والواحد منا تحته خمسطعشر مخده عشان يلحق الدكسوون ونمسك الدركسون باليمين ونجلس بزاوية الكشن واليد الثانيه على الشنب نمسحه كن في شنبات عاد والطاقيه مكبوسسه على العيون هههههه ويا ويلك يالله تطالع فينا عند الاشاره شوفوا له اول نظره بس واذا عادها يا ويله بالويل انواع النذاله واللقافه هههههه واذا كان رجال وفيه خير وقدها يلحقنا يم الحااره هههههههههههههه
    وعقب تطورنا واستلمنا الهنوود والافغانيه حقين السياكل ليش لانهم يسوقون سياكل والسشياكل عندنا ماهم قدها ما يركبها الا الاشنااب المهم الله لا يوريكم يا ويل الهندي اللي نشوفه على سيكل هههههه تدرون وش نسوي
    كنا نجمع الفلوس حقت الفسحه لين يصير مع كل واحد ريالين صافي ونروح نشتري لنا كرتون بيض وتعالوا شوفوا الهنود المساكين لا من زود اللقافه والنذاله اذا نويناهم ولا معنا فلوس رحنا نجمع الاكياس ونعبيها مويه ونبردها في الثلاجه وفي عز المربعانيه ندورهم دوره هههههههه
    ونجي مسسرعين واقرب واحد عند الدريشه ينتف الهندي يا عزي عنهم والله بدوا يختفوون بالليل ما عاد يطلعون هههههههه ومن المواقف المحررجه واللي من جد خلتنا نبلع العافيه ونتوب الموقف هذا
    مرره كنا مشترين اربع بيضات بريالين ونفرفر في الشوارع ندور بس ريحة واحد على سيكل لين ملينا مالقينا احد وصدفه الا جايك هاك الافغاني اللي ما فيه اكبر من علابيه يذكرني بحلاق حميدان عاظم هههههه المهم حنا شفناه ؟ والله تقوول شايفين ابليس حده حده يمين يسار وين راح ايه هذا هو اطرح الرجااال هههه وسواقنا الله يسلمه يقربنا منه شووي لين بغى يصدمه وحنا نطلع يدينا عشره مع الدريشه وكلن يبي يصفقه بالبيضه قبل الثاني والله ونحذفهن عليه بكل ما اوتينا من قوة وصابه اللي صابه واخطاه اللي اخطاه المهم ان الرجال انقلب لونه الى الصفاار وننبسط ع الاخر وحنا ماشين كان فيه قدامنا اشاره ما انتبهنا لها ومن سوء الحظ ولعت حمراء هههه وتعال شف اللي قبل شوي شجعاان كيف صاروا لما وقفنا ههههههه واشجع واحد فينا سواقنا قلنا له يا ولد الافغاني جانا ويطبخ من القهرر والله ليقطعنا تقطيع قال لا ما عليكم نمسكه ونتوطا في بطنه ويوم شفنا خوينا كذا قلنا ما علينا منه نتوطا في بطنه ولا همنا يوم قرب الافغاني وشاف علابيه رفيقنا ضاعت علومه وهو يتلها باثنين ويقطع الاشااره ويفكنا الله من شر هاك اللافغاني ...
    الله يتووب علينا ولا يواخذنا بافعالنا

    شكلي تحمست للموضوع اكثر من اللازم

    يوووووه والله السوالف وااجد يالربع بس والله اني تعبت ان شالله اكملها لكم مع الجزء الثاني حق حميدان . هههههههههههه

    المهم استروا ما واجهتوا .

    تحياتي لك حميدان
    ولجميع اخوتي هنا
    اخوكم / ناصر

صفحة 1 من 3 123 الأخيرةالأخيرة

كلمات دليلية Tags

جميع ماينشر يمثل الكاتب ولايمثل الموقع والادارة والمشرفين
الدورات التدريبية جامعة نجران
يشرفنا اعجابك على فيس بوك facebook