كيف تصبح نصاب محترف
جربان؟ عدمان؟ مش لاقي تاكل؟ عندك طموح تكسب فلوس بسرعة الضوء؟

ما تحملش هم يا سمارة يا بو دم خفيف. الحل عندنا!

طبعا عاوز تعرف ازاي. فكر شوية يا جميل وانت تعرف انا قصدي ايه. يا سلام عليك يا سوسو جبتها! حعلمك طريقة لا لون ولا طعم ولا ريحة في النصب والاحتيال على الهبل واولاد الحلال. وافتكرني بقى لما تبقى نصاب معتبر تاكل من عرق فهلوتك ولا حدش يقدر يقولك ربع العشرة كام وما تنساش العمولة!!

اول حاجة لازم تعملها هي انك تتعلم كمبيوتر وانترنت والذي منه ماعرفش ازاي. دبر نفسك انت بقى! هو انا لازم اعلمك كل حاجة؟؟

بعدها بقى تبدا تدخل المنتديات التقنية وتسجل فيها تتعلم حاجة من هنا وحاجة من هناك لحد ما يبقى عندك فكرة عن اللي بيحصل عبر الشبكة العنكوبتية عشان تضيف لها اخطبوطيتك الجديدة. تعمل نفسك واد اخلاق راقية وعلم وتلعب الشويتين دول على اصحاب المنتديات اللي تدخلها. طبعا هما حيتغشوا بيك ويفتكروك حاجة كويسة ويعملوك مشرف عندهم. الخطوة دي مهمة عشان حتعرفك على زباين المستقبل..

بعد ما تتعلم الصنعة تبدا الشغل على تقيل. اعمل لنفسك موقع واديله اسم حلو كدة يخلي الناس تجري عليك تسجل عندك. يعني مثلا فورسان النت دوت كوم فوربيدن دوت كوم نصابين دوت كوم. شغل مخك انت بقى!!

دلوقتي نيجي لجد الجد يا حلو. تدور على ضحايا هبل تنصب عليهم واحسنلك تختار ضحاياك من الجنس الناعم. دول هما اللي حيشبرقوك. حياكلوك الشهد بمعالق دهب وفضة ومرجان وياقوت كمان. قولهم عن انجزاتك العظيمة وانك مصمم عالمي محترف وان تصاميمك مطلوبة وكل الشركات بتطلبك بالاسم ده حتى بيل جيتس زات نفسه طلب منك تصمم موقع ميكروسوفت بس انت رفضت عشان ماعندكش وقت. يا واد يا تقيل!!

وعشان تحبك العملية وما تتكشفش يا حلو ادخل المواقع بتاعة التصاميم المجانية وخد التصاميم اللي تعجبك. عدل عليها شوية وحط اسمك عليها وقول انها بتاعتك. يا سلام دنته حتغرق في الشهد يا سمارة..هاتلهم كام تصميم حلوين يفرحوا بيهم. طبعا حيقولولك غير وبدل واعمل وما تعملش.. اسمع الكلام وما تعارضش. سيبهم يفرحوا شوية. ما تستعجلش. النصب يا حبيبي اكلة ما تتكلش الا وهي باردة!!

وما تنساش حاجة مهمة خالص الا وهي جمالك الاسطوري لو كنت جميل طبعا. وريهم صورتك. خليهم يدوبوا في دباديب اللي خلفوا اهلك. انت ماسمعتش ان الحلاوة هي اقصر طريق لقلوب الستات؟؟؟

دلوقتي ضمنت اول هبرة مجانية في حياتك. قولهم انك ما تقدرش تنزلهم التصاميم اللي هما عايزينها لحد ما يدفعوا الفلوس .اصل الشركة لازم تضمن حقها..! طبعا الهبل حيصدقوك وحيبعتولك الفلوس عشان مستعجلين. يا حلاااوة يا سمارة!!

ايه رايك في الهبرة دي؟؟

يلا بسرعة عايزين دعوة من دعواتك اللي ما تخرش المية وشوية بنكنوت نعدل بيهم المسائل.

تحزيررر:

انا ماليش دعوة لو الخطة ما نجحتش بسبب غباءك! ما تجيش تعيطلي لو فشلت يا سيد النصابين منقوووووووول للهزار فقط مش للتطبيق