هذه قصيده نبطيه جميله للشاعر حامد زيد حبيت انقلها لكم



........................................
اي بالله اخطوا والخطا الي جابهم عين الصواب
مبطي وانا اشوف الطمع يكشف رداهم واستره
مايملي عيون الحسود بهالزمن غير التراب
ومن لايتوب من الخطا تحرم عليه المعذره
اللي من اولها خراب اكيد تاليها خراب
والبندق الي ما تثور في هدفها تذعره
ودك ليا من جاتك الغلطه من الناس القراب
الصاحب الي ماكسبت بمحبته ماتخسره
مشكلتي اني ماعرفت احسب لصدتهم حساب
قلطتهم صدري على ذكري قصيد وحنجره
صوت يصول بمنظره وخطاب مابعده خطاب
والطيبه اللي زعزعت صوت الخطيب ومنظره
مافيه دمع صوبوه احبابي بوجهي وخاب
ولازرق حزني على غالي ولا فج نحره
كل الذهاب اللي معي ذكرى من اصحاب الذهاب
والي بقالي من عذاب اشرف طريقي واخطره
لاني تجنبت الغرق عديت من فوق السحاب
لان اكثر اصحابي ورق ماشفت للطيب ثمر
والله ماحطيت بين الحقد والخوه حجاب
حتى غدوا ربعي يحدوني على الضيق اشكره
البارحه ثارت على ارقاب واوتني ارقاب
البارحه يا ثقل دم البارح ويا محقره
اهب يا وجه الحسد وشلون جمعهم وغاب
كيف السنين الى عطتني بعثرتهم بعثره
اثر المصايب ماتجيك الا من الناس القراب
وبهالزمن حتى الخوي اللي تثق فيه احذره
لابارك الله في رفيق تزعله كلمة عتاب
ولا جمع الله الرجال اللي تفرقهم مره
عودت نفسي كل ما شددت لليمه ركاب
ماصد وجهي عن طريق الا ليا جبت خبره
الصاحب اللي مايجي من صحبته غير العذاب
نذر على ان ماهجرني والا انا اللي بهجره
من يفتح لفرقاي باب افك له عشرين باب
واذا خويي ما يقدر خوتي ما اقدره
ان روحوا فانا بري منهم ليوم الحساب
وان جرحوا قولولهم ماحركوا في شعره
شفهم لهم حول السنه ولا خذوا مني جواب
احسن دوا للي يحاول يستفزك تحقره
انا جمعت اوراقهم بكتاب واغلقت الكتاب
ياوقت لم الي تلمه وانثر الي تنثره
ماكنت احاتيهم صغير عاد احاتيهم شباب
اما ذخرني صاحبي لليوم الاسود ما اذخره
عقب اكتئاب البارحه ماعاد انا حمل اكتئاب
الطيب جرجرني وانا مانيب ناقص جرجره
اللي يخاف من الظما يترك لنا طرد السراب
واللي مب قد الظلام ووحشته لايسهره
انا تجرعت الظما لين احترق وجهي وذاب
انا كسرت بخاطري قبل الصداقه تكسره
انا خسرت اللي غيابه غير عن كل الغياب
انا غفرت لعالم ما تستحق المغفره
انا اكثر انسان تعلم من كثر ما اخطى وصاب
انا اخر انسان يتكلم في زمان الثرثره
انا القصيد اللي نزع من دفتره مليون ناب
وانا الوحيد الي جمع مليون ناب بدفتره
جفني وجرحه السهر حيلي وهدته الصعاب
دمعي هدر ضحكي ندر عمري وضيعت اكثره
شيبت بعقول العرب هيبت روس ماتهاب
جمهرت ناس ماعمرهم مايعرفون الجمهره
ماصرت ذيب الا لان اللي حواليني ذياب
ماكنت اغيب الا لان العفو عند المقدره
وترى حلاتك لاحملت لصاحبك كلمة عتاب
اما نطقت بها بوجهه ماتذمه بظهره
في هالزمن ما يملي عيون الحسود الا التراب
ولا الحظيظ الطلقه الي ماتصيبه تذعره
ودك ليا من جاتك الغلطه من الناس القراب
الصاحب الي ماكسبت بمحبته ما تخسره
..............


منقوووووول للفائده