السلام عليكم ورحمة الله

قد يحزن احدنا لفراق غالي فيرى ان بيبان هذه الدنيا قد اغلقت في وجهه
فيخيم الحزن والياس على حياته
فهو لم يفارق شخص واحد بل فارق العالم باكمله
فما بالكم بمن فقد غاليه بدون رجعه
اترككم اعزائي مع هذه المرثيه للشاعر الكبير
سعود الفهد

ازاور قبرها

طرت لي تربة حلو ثراها *** عسى ربي من الغيمه سقاها

طرى لي قبر محمول التهايا *** الا ياويل روحي واعناها

ازاور قبرها في كل ساعة *** وصار القبر غالي من غلاها

تزيد اجروح قلبي يوم اجيها *** واقبل رملها ويا حصاها

اكلمها ولا تسمع كلامي *** ولا تدري بروحي وش لفاها

لفاها هم وهوجاس وعله *** وحتى العين خايف من عماها

الا وشلون نسلى كيف نسلى *** وجرح الروح مفقود دواها

الا وشلون ننسى كيف ننسى *** وروحي زايد فيها شقاها

هي اللي دايما تتبع رضايا *** وانا صافيتها واتبع رضاها

ولكن القدر لا بد منه *** اقول اللي خلقها هو خذاها

بقى تذكار حبي لرحيله *** ثبت بالقلب مايرحل معاها

بقى ذكرى عيوني في عيونه *** حشى لله قلبي مانساها

الا ياقبر ما والله انسى *** وشلون ام الولد تنسى ضناها

الا ياقبر لاتجرح جسدها *** طلبتك لاتسبب في غثاها

حسايف جسمها الناعم حسايف *** حرام الدود ياكل من حشاها

ترفق زينها حذرى دماره *** الا ياقبر لا ينفذ حلاها

يقوله من فقد كل السعادة *** على فقدانها يكتب رثاها

كتبت اللي جرى لي بالقصيدة *** لاجل يدري بحالي من قراها