اكل الحامل

من المشاكل اللي بتواجه اي بنت في بداية زواجها وتفكيرها في الحمل هو الخوف من زيادة الوزن، وخاصة ان كانت بذلت مجهودا قبل الزواج في الريجيم.. كلام كتير ونصايح اكتر من الامهات والحماوات عن الاكل في الحمل والرضاعة طبعا من منطلق خوفهم على الام والجنين ولكن مع الاسف قد تنتهي كل هذه الارشادات في الغالب الى ان الام تتخن جدا وهي في بداية حياتها...



الحمل والرضاعة.. الطريق السريع للسمنة بعد الزواج.. وبجد مشكلة المشاكل!!..
فيه اعتقاد ان الحامل لازم تاكل اكل اتنين وترتاح وتنام على ظهرها طول الحمل عشان الحمل يعدي وحاجات كتير من الوصايا الخاطئة التي نتداولها وننصح بها الحامل خوفا منا على صحتها وسلامة الجنين.. و طبعا كل ده خطا جدا..

طبعا الحامل تاكل لا اعترض على ذلك لكن اكل صحي مغذي مش اكل يتخن.. الحامل اللي بتزيد عن كيلو كل شهر طوال فترة الحمل يعني يصبح وزنها زايد من 10 - 12 كيلو في التسعة اشهر ده معناه انها مريضة بالسمنة وطفلها هيكون عنده بالتالي مشاكل في المستقبل.

وبعد ما تولد تبدا ترضع وتسمع النصائح المعتادة.. كلي حلاوة وكتري من المكسرات واشربي مغات وكلي على قد ما تقدري عشان اللبن والام تتخن وننسى ان الجرجير يساعد على ادرار اللبن وبغزارة وكل الورقيات والخضروات بشكل عام... فترة الحمل والرضاعة لما تتغذى الام فيها بطريقة غلط وتتخن جدا بتكون مع الاسف حطت نفسها على اول خطوات السمنة ومشاكلها التي لا تنتهي، وبالطبع يعقد الامر اكثر اعتقاد الام المصرية ان اهمالها لنفسها واجب مقدس؛ لان مفيش وقت تعمل ريجيم ولا تلعب رياضة لانها مشغولة بالاولاد هو ده واجبها وانها بالطريقة دي بتضحي وهي كده ام كويسة لا تهتم بشيء في الدنيا غير بيتها واولادها وبالطبع ده غلط وله تاثيره السلبي على حياتها.. وعلاقتها بزوجها وحتى على صحتها فلا تتمكن من رعاية اولادها بسبب الامراض التي قد تصيبها من وراء السمنة.
ومن الحاجات اللي دايما الازواج بيشتكوا منها... ان الزوج اتجوز بنت جميلة من كام سنة وزنها 50 كيلو والنهارده عايش مع واحدة تانية وزنها 120 كيلو وهو بجد مش عارفها من كتر الدهون اللي غيرت شكلها وملامحها.. اعتقد انها مشكلة حقيقية لازم كل واحدة تنتبه لها وتبدا بسرعة عشان تكسب صحتها وحياتها كمان....




الحامل ممكن تعمل ريجيم؟
مفيش حاجة اسمها الحامل تعمل ريجيم يخسسها... لكن تاكل صح والمقصود هنا بالريجيم "النظام" في الاكل... الام الحامل بتلجا لطبيب الريجيم مش عشان تخس لكن عشان تزيد فقط عدد الكيلوات المسموح لها في فترة الحمل من خلال وجبات مكتملة العناصر الغذائية... وبعض اطباء النساء يطلبون من الحوامل المتابعة مع دكتور متخصص، لو كانت في حملها الاول زادت على وزنها 10 كيلو مثلا ومن الصعب ان تدخل الحمل الثاني وتزيد 10 او 12 كيلو كمان..!! فيطلب منها الدكتور ان لا تزيد وزنها الحالي اكتر من 6 كيلو مثلا.. وهكذا؛ لان السمنة توذى الام والجنين وتعرضهم لمشاكل كتيرة ومخاطر هي في غنى عنها لو نظمت اكلها.





النظام الغذائي المثالي..؟؟؟
ممكن الام تتناول خمس وجبات، لكن طبعا حجم الوجبة اقل من الوجبة العادية، وتكون فيها كل العناصر الغذائية اللي ممكن نستبعدها في الريجيم العادي يعني الوجبة فيها نشويات وسكريات وزيوت لكن مع تقليل الدهون ونزود من اللبن وبالطبع من الافضل ان يكون خالي الدسم... ونهتم جدا بالفاكهة والخضروات والورقيات، وخاصة بعد الولادة عشان الرضاعة ومع ممارسة رياضة خفيفة زي المشي.. خلال فترة الحمل الام ممكن وزنها يبقى مثالي وترجع لوزنها السابق بعد الولادة مباشرة.





امتى الام تبدا ريجيم بعد الولادة..!!
قبل ما تخرج من المستشفى ممكن دكتور التغذية اللي متابعها يحدد لها طبيعة الاكل اللي ممكن تمشي عليه في الاشهر الثلاثة الاولى التي تلي الولادة... دكتور التغذية بينصحها تاكل كل حاجة لكن بكميات قليلة وتعتمد على العصائر الفريش والسوائل بكثره وتهتم باكل الجرجير والخس والبقدونس عشان تحصل على الكالسيوم... ولا تفرط في السكريات بحجة الرضاعة، وتتجنب الدهون؛ لان الام طبيعي في هذه المرحلة بتفقد وزنها الزائد بعد الولادة، ومهم انها تستغل هذه الفترة في العودة لوزنها السابق مع عدم الاضرار بالعناصر الغذائية التي تصل الى طفلها من خلال اللبن.
ممكن الام تخس 4 كيلو في الشهر لو نظمت اكلها صح ورجعت تمارس رياضة، ولكن حسب حالتها الصحية وبعد استشارة طبيبها المختص.