مشاهدة : 53395
النتائج 1 الى 3 من 3

كلمات صاحب الصوت العذب عبادي الجوهر

  1. #1
    صورة عاشقة كونان
    عاشقة كونان غير متصل طالب متوسط
    تاريخ التسجيل
    Jun 2006
    الدولة
    دار ابو متعب
    المشاركات
    225
    Thanks
    0
    شكر 0 مرات في 0 مشاركات

    كلمات الفنان المبدع عبادي الجوهر اهديها لكم واتمنى منكم ان تشاركوا في كتابة اروع اغانية وكلماته

    انتي سراب




    انتي سراب ورملك الضامي انا
    انتي وكاي وحلمي وافراح وعنا
    ياللي لكي بقلبي مكان
    عايش بلا وقت وزمان
    مدري قسى قلبك على
    والا الهوا مابه حنان

    انتي عذابي يافتون
    انتي لي الصدر الحنون
    تدرين قلي في ايدي
    واني انا اللي بفقدك
    وحدي انا اللي دايم
    اركض ورا اللي يسعدك

    انتي فرح عمري وياليتك عذاب
    انتي امل ظامي ولو انك سراب
    ان كان حبك غلطتي ماهو بانا الغلطان
    ليه الجفا يادنيتي صار العطا حرمان
    لاتتركيني فحيرتي قصه بلا عنوان

    .................................................. .......................

    شهر


    ياللي تحبيني شهر ..
    ثم تجافيني شهر
    ثم تحنيلي شهر .. وتفكري كيف الرجوع كذا شهر
    وترجعيلي في شهر ..
    ماقد خطر في خاطرك .. ان السنة اثنعشر شهر ؟!

    وقتي معك نصفه هموم
    ونصفه الباقي اسى .. ولو طبعك القاسي نسى
    وبالصدفة جاء مرة صباح .. وكلمة منك فرحتني
    لابد ما همس الجراح .. تسمعيني في المسا
    ولو تعتب جروحي عليك .. وتشتكي منك اليك
    بترجعي تحبي شهر .. ثم تجافيني شهر
    ثم تحنيلي شهر .. وتفكري كيف الرجوع كذا شهر
    وترجعيلي في شهر ..
    ولا يجي في خاطرك ان السنة اثنعشر شهر

    اعذريني لو اقول .. حبك نسى معنى الفرح
    اعذريني لو اقول .. وشلون يذكرنا الفرح ؟!
    مادام اذا كنتي قريبه .. كل تفكيري يكون ..
    بعدك متى ؟! .. والى بعتي ابلا سبب
    الاكيد بترجعي .. بس الاكيد هذا متى ؟!
    ولو تعب مني الصبر .. ومل من صبري العذول
    وقلت ياناس اسالوها .. الحب هو كله هجر ؟!
    ردك يجيني في شهر ..
    قالوا تقول :
    " ماينتظر .. بس يشتكي !
    يصبر علي .. ترى السنة اثنعشر شهر " ؟!

    .................................................. .............


    ابسالك




    ابسالك .. هو انا استاهلك ؟
    !استاهل الدمع اللي جرح وجنتك ؟
    استاهل اني اعشقك ؟

    ابسالك عن حالنا .. انتي وانا ياللي احس ..
    انك انا حالنا ما هو غريب
    انا نكون متاكدين ان الفراق ما هو بعيد
    بالرغم من جرح السنين عشقنا دايم يزين
    ماهو غريب .. اني لو مرة في همي نسيت وبكلمة جرحتك
    قبل ما تتالمين .. اللي ينزف هو دمي
    ابسالك ماهو غريب ..
    استاهلك

    ابسالك لو قلت لك
    ان الحنان اللي في قلبك ينبت من الصخر الزهر
    .. وان النهار اللي في خدودك يخلي النسمة عطر
    .. وان العذاب اللي في عيونك يعلم الناس الشعر

    .. ولو قلتلك اني احبك اكثر من هموم البشر
    وكثر الجفا وكثر السهر ...
    لو قلت لك وانك اقرب من عيوني للنظر
    كل الذي اقدر اقوله واللي ما اقدر اقوله
    استاهلك .. حبيبتي ؟!وباجاوبك
    .. للاسف ما به احد يستاهلك
    .................................................. .....


    لليل احبك




    لليل احبك .. مابقى في السما نور
    و الى ضواني الليل .. للصبح احبك
    و اللحظه اللي كلها صد و غرور
    اشوف قبري بين عينك و قلبك
    في صدري اسراج حزين ومكسور
    رغم المطر و الريح .. شلته افدربك
    و الله مابه غير لوعاتي اقصور
    و خوفي عليك الله ربي .. و ربك
    الى متى ببني على صمتك اجسور
    لا حيرتني اسباب سلمك و حربك
    العمر احبك .. مابقى فيني اشعور
    و متى جفاني العمر .. وشلون احبك


    .................................................. .............
    تدرين وادري

    تدرين وادري بنفترق
    تدرين قلبي بيحترق
    حنا اتفقنا في كل شي الا الزمن
    عيى الزمن لا نتفق
    ولاتزعلي لو نفترق
    قلبك خلي
    وقلبي انا اللي بيحترق

    ياوردة في كل الفصول
    يافرح عيى لايطول
    قولي واقول
    ان كان عندك لي حلول
    يافرحة القلب الحزين
    الوقت يمر ..
    ومالك عذر
    كانك تبين ننسى العمر ..
    ننسى السنين
    وانذوب في حب وحنين
    تدرين وش سر الحكاية
    الوقت يمر .. ولكل شي لابد نهاية
    وحنا قربنا من النهاية
    ومالك عذر
    يابسمة الثغر الخجول
    ان كان عندك لي حلول
    وان كان ودك نتفق
    والا ترانا بنفترق
    ولاتزعلي لو نفترق
    قلبك خلي
    وقلبي انا اللي بيحترق

    ياحب .. يادنيا جديدة
    يا احلى ابيات القصيدة
    ان كان جرحي ما كفى
    انزفلك جروح جديدة
    وان كان شعري ماوفى
    انسى الحكي وانسى القصيدة
    يا احلى ايام العمر
    كثر الحكي وش بيفيد
    ومابقى عندي صبر
    والجرح في قلبي يزيد
    مالك عذر
    يابسمة الثغر الخجول
    ما اظن عندك لي حلول
    وما اظن ودك نتفق
    واحنا ترانا بنفترق
    ولاتزعلي لو نفترق
    قلبك خلي
    وقلبي انا اللي بيحترق
    .................................................. ....................

    قاالوا ترى




    قالوا ترى مالك امل في قربها لو يوم
    ابعد وجنب دربها .. هذا هو المقسوم
    قلت اتركوني واسكتوا .. خلو العتب واللوم
    قدني غرقت في بحرها .. ولاعاد يفيد العوم
    قالوا ترى في حبها ويل .. واسى .. و هموم
    قلت ان قتلني حبها .. حسبي تقول مرحوم
    قالوا انسى ذكرها .. منتب بها ملزوم
    قلت ابشروا ياعذلين .. بنسى لذيذ النوم
    قالوا بتلقى غيرها .. واترك هواها اليوم
    قلت العفو ياحسدين .. ما ابدل قمر بنجوم
    قالوا لغيرك حبها .. قلت الجواب مفهوم
    دام انها متهنيه .. وشلون اصير محروم
    بقضي الليالي انتظر .. صابر على المقسوم
    متعلق بطرف الامل .. يمكن يجيني نوم
    قالوا ترى مالك امل .. في حبها لو يوم
    ابعد وجنب دربها .. وهذا هو المقسوم



    .................................................. ................
    اصدق ماكتبت


    انتي .. تدرين من انتي ؟!
    تدرين انك لي غديتي كل شي
    وانك غديتي شمس ليلي وفي الهجير الفي
    وانك اصدق ماكتبت
    وانك احزاني وفرحي .. لاضحكت اوانجرحت
    وانك غديتي ياعذابي اغلى من حبك علي
    قبل احبك .. يا ما كذبني القصيد
    وبعد حبك .. صار يكتبني القصيد
    هو يوصفك بسمة وطرف
    وانا اعشقك في كل حرف
    منك شكالي .. وصف حسنك اتعبه
    وانا شكيتك .. وعشقي لحبك اعجبه
    ومهما شكى ومهما وصف
    انتي احلى ماكتبت .. انتي اصدق ماكتبت
    وانتي احساسي وجرحي .. لاضحكت او انجرحت
    وانك غديتي يا عذابي اغلى من حبك علي
    تدرين من انتي .. !!




    ام ي



    اسالوا دمي .. وسعادتي وهمي

    اسالوا التوفيق ..

    والكدر والضيق

    اسالوا الطيب في صفاتي ..

    والدعاء اللي في صلاتي

    واسالوا شهودي ..

    الدموع اللي في سجودي

    اسالوهم .. واسالوا دمي ..

    عن غلا امي



    .................................................. ......

    بس معك



    بفارق فراقك وبخنق عبرتي واجرح اضمادي واسافرلك معك
    بشد للماضي واقدم ساعتي واعاند اعنادي واقودك واتبعك
    بجامل احزاني واجافي فرحتي واعادي خلاني واحبك واخدعك
    بصير انا طبعك وانتي طيبتي وبيحزنك ضحكي .. وهلي بمدمعك
    بسامر دموعي واعزي ضحكتي وبهدي انا ضلالي .. ضلال ياسعك
    بلبس انا ذلك .. وقيسي عزتي وبتصيري ذنوبي وخيري بيطبعك
    بحارب في ضعفي وافر في قوتي والى رضختيلي لموتي بدفعك
    ولجل اللقاء برحل وتمضي رحلتي والى حصل شوفك بكون مودعك
    اببعد واوصلك وبسبق خطوتي وبنثرك فيني وانسى اجمعك
    بضم انا هجرك في قربك وحدتي وتدلك عيوني وقلبي مضيعك
    واذا اضلمت دنياي بطفي شمعتي واذا كثر زادي بجوع وبشبعك
    شردتي رقادي وسمعتي نضرتي وغمضت انا عيوني لجل ما اسمعك
    صرخت في سكوتي ولمستي صرختي وقربتي وجهك لي لجل ما اصفعك
    عند الحزن تثقل خطاكي دنيتي وعند الفرح قالت خطاكي مسرعك
    قصيدتي يكفي .. غبية كذبتي حبيبتي اسف بخونك .. بس معك



    .........................................

    دخون



    هو فيه مثلك .. ياللي الحسن ظلك
    ليه العطر ؟!
    وانتي انفاسك دخون
    وليه الكحل
    وانتي ماغيرك عيون
    وليه تفكيرك يكون
    انك تكوني دايم اجمل
    انتي اجمل
    من جمالك
    من دلالك
    من خيالك
    ياللي كل افراح قلبي والحزن
    في المسافة بين فرقاك ووصالك
    وليه يالقلب الحنون
    تاخذك فيني الظنون
    ضيعتي عدلك .. هو فيه مثلك .. ؟!




    انتي ماغيرك عيون
    وانا احبك .. وانتي انفاسك دخون
    ياللي احبك .. ليه احبك ؟
    او ليه ماحبك .. ؟!
    وانتي علمتيني ان الحب كله اسئلة ما تنتهي
    ليه ما احبك .. ؟!
    وانتي علمتيني ان الحب لا غدا لمثلك .. ابد ماينتهي
    ياللي علمتك عذابي والهجر .. ليه ما احبك ؟!
    ياللي علمتك تكوني ..في ضعف ضعفك .. اقوى مني
    يا انتي ضحكاتك تغني .. وابتساماتك شعر
    يا انتي ضحكاتك تغني .. وكل ما شفتك اصر
    انك اجمل من جمالك .. من خيالك .. من دلالك
    على حبك انا .. بقفل ابوابي
    وبطيوفك انا.. بسقي اهدابي
    يا انتي .. يا انتي احبابي
    تصدقين .. تصدقين .. صدقي
    قلبي لكي وحدك . .صدقي
    ماقوى على بعدك دقايق .. بس دقايق
    ياظلي .. يا داري
    يا اجمل ..افكاري ..
    تظلميني لوتقولي اني عاشق .. بس عاشق !!
    ياللي وحدك تسمعي صمتي وكلامي
    ياللي ضيك ..اتعب همومي وظلامي ..
    صدقي اللي في قلبي لك ..
    اكبر من افكار القصايد والحكي
    تصدقي انك اجمل في عيوني من جمالك من خيالك من دلالك
    لا يالقلب الحنون
    لا تاخذك فيني الظنون
    .........................................

    سبعة ارقام





    بيني وبينك سبعة ارقام وجفا
    عندي بقايا جرح وعندك بقايا وفا
    لاجزا الله هالدنيا خير
    في كل لحظة طبع غير
    ياللي جفاك طول
    ترى المغيب اقبل
    وما عاد به شي نخافه
    لامن غدت كل المسافه بيني وبينك سبعة ارقام
    سبعة ارقام وجفا

    بيني وبينك كان شي يسمى حب
    كنا بنقطع به درب طويل صعب
    فيها الحسد والخوف
    فيها العذول اللي يستمع بالشووف
    فيها الرجوع اصعب من النسيان
    فيها الصديق اقسى من الانسان لامن جرح انسان
    ياللي احبك غصب
    الدرب ماله درب
    وكل شي صرنا نخافه
    دام انها كل المسافه .. بيني وبينك
    سبعة ارقام وجفا

    ياللي ضيعتي الوفا
    اليوم ضيعني الوفا !
    اقبلي مني الجفا .. واقبلي عمري اللي ضاع
    وارضي لي ب الهم رفيق
    ولا لمحتي مركبي في بحر حبك غريق ..
    ابعدي .. لاتضعفي .. لا تمدي لي الشراع
    ياللي قتلتي كل شي
    ما ابغى منك الا شي
    حققي لي اللي ابي واقبلي مني الوداع
    ولاذكرتي ما مضى ... اكتبي سر الضيااع
    سبعة ارقام .... و دفا ,,,
    ..................................................
    ماقلتلك

    ماقلتلك .. ماتقدري على الحب ماقلتلك
    بس انت عمرك .. ماسمعتيلي كلام لو قلتلك

    انا قلتلك من اول المشوار .. الحب ذا قدار
    وانتي صغيره والهوا لو جار .. ماتقدري عن نار
    ماقلتلك

    شفت النتيجة ياخسارة دمعتك
    فوق الخدود رسمت نهايت قصتك

    حبيتي بس ياخسارة حبيتي سراب
    ماناب كله سهد ودموع وعذاب

    انا قلتلك من اول المشوار .. الحب ذا قدار
    وانتي صغيره والهوا لو جار .. ماتقدري عن نار
    ماقلتلك
    .........................................

    العواذل




    حبيبتي كل العواذل تشابه ..... قلب ظلام ووجه يشبه للاصحاب

    ولا ما غدى لك صاحب ينحكى به ..... لا تسمعي ان كان لك قلب واحباب

    الى مشيت الدرب يلهث سرابه ..... والى سكنت الدار ناداني الباب

    وشلون انام وهم قلبي صوابه ..... والشوك ينبت بين جفنين واهداب

    تعبت امني .. الاسئلة بالاجابة ..... وانطر شروق الشمس والشمس بغياب

    وتعبت اناظر والمعنى عذابه ..... انك بعيده والملا دونك حجاب

    اجمع كلام وما اعرف الاجابه ..... وعندي شعور صدق والوقت كذاب

    كل النجوم اللي امطرت من سحابه ..... حبيبتي دمعك جرح قلب واتراب

    واللي وقف ما بين بابي وبابه ..... قلب ظلام .. ولابس ثوب الاصحاب
    .................................................. .................................................. ..............ز
    وبس اللي عنده كلمات اضافية ياليت يشارك وياليت اسمع ردودكم

    فيس بوك





    من الاذكار اليومية: حسبي الله لا اله الا هو ، عليه توكلت وهو رب العرش العظيم ..(سبع مرات)

  2. #2
    صورة غازي الصوفي
    غازي الصوفي غير متصل طالب متوسط
    تاريخ التسجيل
    Apr 2006
    المشاركات
    256
    Thanks
    0
    شكر 0 مرات في 0 مشاركات
    مشكووو اختي علي الكلمات
    بس ممكن طلب؟
    ابغي اغنية تدرين و ادري بنفترق و الله لا يفقر المحبين/
    بس تكون بالعود معليش علي الشرووط
    واكون شاكر لك

  3. #3
    صورة عاشقة كونان
    عاشقة كونان غير متصل طالب متوسط
    تاريخ التسجيل
    Jun 2006
    الدولة
    دار ابو متعب
    المشاركات
    225
    Thanks
    0
    شكر 0 مرات في 0 مشاركات
    اخوي غازي بحاول قد ما اقدر واوعدك ان شاء الله اني اجيبها لك





    من الاذكار اليومية: حسبي الله لا اله الا هو ، عليه توكلت وهو رب العرش العظيم ..(سبع مرات)


كلمات صاحب الصوت العذب عبادي الجوهر


مواضيع على تشابه

  1. كلمات اغنية وش فرق عبادي الجوهر 2013
    بواسطة sagdaa في المنتدى ممنوع - موضوع × مواضيع
    مشاركات: 0
    اخر رد: 20-01-2013, 09:32 PM
  2. كلمات اغنية ماطرالك عبادي الجوهر 2013
    بواسطة sagdaa في المنتدى ممنوع - موضوع × مواضيع
    مشاركات: 0
    اخر رد: 20-01-2013, 04:07 PM
  3. كلمات اغنية اسف عبادي الجوهر 2013
    بواسطة sagdaa في المنتدى ممنوع - موضوع × مواضيع
    مشاركات: 0
    اخر رد: 18-01-2013, 06:16 PM
  4. كلمات اغنية حبر وورق عبادي الجوهر 2013
    بواسطة sagdaa في المنتدى كلمات اغاني كلمات اغنية فنان
    مشاركات: 0
    اخر رد: 17-01-2013, 05:25 PM
  5. كلمات اغنية المزهريه عبادي الجوهر 2013
    بواسطة sagdaa في المنتدى كلمات اغاني كلمات اغنية فنان
    مشاركات: 0
    اخر رد: 17-01-2013, 05:13 PM

كلمات دليلية Tags

الدورات التدريبية جامعة نجران - ارشيف - تراسل
يشرفنا اعجابك على فيس بوك facebook