موت الفرس بعد الحبيبة
هلكني يا ملاح الازرق كي يتلاح بعد اختي غي زياد يحيا في الدنيا
عودي في ذا التلول رعى كل خيول و اذا والى الهول شاو المشليا
ما يعمل ذا الحصان في حرب الميدان يخوح شاو القران امه ركبيا
اش لعب في الزمول اعقاب المرحول انا عنه نجول بيا ما بيا
بعد شهر ما يدوم عندي ذا الملجوم نهار ثلاثين يوم وراء حيزيا
توفى ذا الجواد ولى في الاوهاد بعد اختي ما زاد يحيا في الدنيا
صدوا صد الوداع و اختي قاع طاح من يدي سراح الازرق اه ديا
ربي اجعل الحياة ووراها الممات منهم روحي فنات الاثنين رزيا

-الصورة الجنائزية
نبكي بكي الفراق كبكي العشاق زادت قلبي حراق خوضت مايا
يا عيني واش بيك اتنوح لا تشكبل زهو الدنيا يديك ما تعفى ش عليا
زادت قلبي عذاب مصبوغة الاهداب سكنت تحت التراب قرة عينيا
نبكي و الراس شاب عن مبروم الناب فرقة الاحباب ما تصبر عينيا
الشمس الى ضوات طلعت و تمسات سخفت بعد ان سوات وقت الضحويا
القمر الى يبان شعشع في رمضان جاه الميسان طلب وداع الدنيا
هذا درتو مثيل عن رايسة الجيل بنت احمد صيل شايعة ذواديا
هذا حكم الا له سيدي مول الجاه ربي نزل قضاه و ادى حيزيا
صبرني يا الله قلبي مات ابداه حب الزينة اداه كي صدت هيا

رثاء الحبيبة
تسوى ميتين عود من خيل الجويد و مية فرس زيد غير الركبيا
تسوى من الابل عشر ماية مثيل تسوى غابة النخيل عند الزابيا
تسوى خط الجريد قريب و بعيد تسوى بر العبيد حاوسا بالفيا
تسوى مال التلول و الصحرا و الزمول ما مشات القفول عن كل ثنيا
تسوى اللي راحلين و اللي في البرين تسوى اللي حاطين عادوا حضريا
تسوى كنوز المال بهية الخلخال و اذا قلت قلال زيد البلديا
تسوى مال النجوع و الذهب المصنوع تسوى نخل الدروع عند الشاويا
تسوى اللي في البحوروالبادي وحضور اعقب جبل عمور و اصفا غردايا
تسوى تسوى مزاب و سواحل الزاب حاشا ناس القباب خاطي انا الوليا
تسوى خيل الشليل و نجمة الليل فاختي قليل قليل طبي و دوايا
نستغفر للجليل يرحم ذا القليل يغفر للي يعيل سيدي و مولايا
ثلاثة و عشرين عام في عمر ام حرام منها راح الغرام ما عاد شي يحيا
عزوني يا اسلام في ريمة الاريام سكنت دار الظلام ذيك الباقيا
عزوني يا صغار في عارم الاوكار ما خلات غير دار عادت مسميا
عزوني يا رجال في صافي الخلخال داروا عنها حيال للساع مبنيا
عزوني يا حباب فيها فرس دياب ما ركبوها ركاب من غير انايا
بيدي درت الوشام في صدر ام حزام مختم تختام في زنود طوايا
ازرق عنق الحمام ما فيهشي تلطام مقدود بلا قلام من شغل يديا
درته بين النهود نزلته مقدود فوق سرار الزنود حطيت سمايا
حتى في الساق زيد درت وشام جريد ما قديتو باليد ذا حال الدنيا
سعيد في هواك ما عادش يلقاك كي يتفكر اسماك تديه غميا
اغفر لي يا حنين انا و الاجمعين راه سعيد حزين بيه الطوايا
ارحم مول الكلام و اغفر لام حزام لاقيهم فالمنام يا عالي العليا
و اغفر اللي يقول رتب ذا المنزول ميمين و حاودال جاب المحكيا
يا علام الغيوب صبر ذا المسلوب نبكي الغريب و نشف العديا
ما ناكلش الطعام سامط في الافوام و احرم حتى المنام وخطى عينيا
بين موتها و الكلام غي ثلاث ايام بقاتني بالسلام و ما ولات ليا
تمت يا سامعين في الالف و ميتين كمل التسعين زيد خمسة باقيا
كلمة براس الصغير قلنها تفكير شهر العيد الكبير فيه الغنايا

في خالد بن سنان بن قيطون فلان قالت على اللي زمان شفناها حيا

وقلبي سافر مع الضامر حيزية