مشاهدة : 3752
النتائج 1 الى 2 من 2

مجموعة قصائد حامد زيد الجزء الاول

للامانه منقوله من دلوعة اهلها 1/ اربع خناجر.... مشكلة لا جات حاجتك بيدين البخيل ما يفكك لين تدفع كثر ما يدفعه و مشكلة لا

  1. #1
    حسام الخليج غير متصل جاي معه ملفه
    تاريخ التسجيل
    Mar 2010
    الدولة
    بلاد الحرمين
    المشاركات
    41
    Thanks
    0
    شكر 0 مرات في 0 مشاركات
    [SIZE="4"][COLOR="#1e00ff"]للامانه منقوله من دلوعة اهلها
    [SIZE="3"][SIZE="3"]

    1/ اربع خناجر....

    مشكلة لا جات حاجتك بيدين البخيل
    ما يفكك لين تدفع كثر ما يدفعه

    و مشكلة لا صرت مطعون بكفوف الدخيل
    في ظهرك اربع خناجر و بالصدر اربعه

    و مشكله لا ضاق بالوقت رجال ثقيل
    يطلب احبابه و عيا زمانه ينفعه

    ليت ربي ما يحاسب خليل من خليل
    دام ما للحظ فزعة و للوجه اقنعه

    دام ما للعذل تالي و ما بالحيل حيل
    الغلا سم نذوقه و مر نجرعه

    نحتري فيه اللقا و الحصيل اهو الحصيل
    مثل حلم ما تحقق و عييت اقطعه

    كني اللي حط بشفاه من جمر المليل
    لا قدر يرميه للناس و ازرى يبلعه

    و الظروف اللي حدتني لنيران و فتيل
    عرضت دمع المحاجر لشي يجزعه

    و المدامع بالغلا لا تحال و لا تحيل
    و المشاكل كل ماجات جات مجمعه

    اعذلوني عن هوى النفس و عيوني تخيل
    في حبيب ما تركته و لازلت اتبعه

    مغرم في حب مثله و لا ارضى له بديل
    عيني تشوفه و قلبي يجوع و يشبعه

    ذاك كل ما زان بالي و طالعت النخيل
    ما ذكرت الا ثباته بوقت الزعزعه

    ما هو الا قطعة من حشا قلب عليل
    و ماني الا قطعة منه مخلوق معه

    لا جميل شفت قبله و لا بعده جميل
    العذارى رهن رمشه و انا رهن اصبعه

    و الله انه لو طلبني طلوع المستحيل
    ل اطلعه منيه مناك يعني لطلعه

    ما علي من الملامه و لا هرج الهبيل
    ما اشجع الرجال لا ثار غيره ما اشجعه

    في عيون اللي عشقني و لا جاني هزيل
    الله اللي حط عشقه بقلبي و ازرعه

    لو سكت ينطق له الصم و الدنيا تسيل
    و ان حكى لو يمشي المزن يوقف يسمعه

    سلسبيل من شفاته يخالط سلسبيل
    معمعه بسكات و احلى سكات بمعمعه

    ما هقيت ان اكثر الليل يمرح بالجدايل
    لين شفته شوف عيني بكفه يرفعه

    و ان حييت و ما بقى لي معه كود ليل
    لسهره باول غروبه و اموت بمطلعه

    و الله ان العشق جمره و طاحت بالشليل
    و ان حصل ما طاعك الوقت بحبابك طعه

    و منهو اللي علم اعداي نكران الجميل
    و منهو الي خان خلي و حاول يقنعه

    كل عاذل ردني عنك يالطرف الكحيل
    يا عسى الله يقلعه يا عسى الله يقلعه

    يا معرض قلب الاحباب للدرب الطويل
    السعه لا بارك الله بالضيق السعه

    و الله ان الوقت قاسي و انا ماني ذليل
    و اشهد ان الرجل مرات ظنه يخدعه

    و انتم تعذلون خفاق بعيون العديل
    ما رحمتم نار جرحه و غيرة مدمعه

    و السوالف ليلها ليل و الحايل يحيل
    و المشاكل مشكله مشكله متجمعه

    مشكله لا خانك الوقت بالحمل الثقيل
    لو زرعت الزرع هوج العواصف يشلعه

    و مشكله لا صار عاذلك ما يبرد غليل
    لا ترده طيب كلمه و لا حد يمنعه

    و مشكله لا صرت مطعون بكفوف الدخيل
    في ظهرك اربع خناجر و بالصدر اربعه



    2/الكذب خيبة.....

    روحي وهالمره خلاص لاتردين
    هذا الفراق وروحة دون رده

    الكذب خيبه ماعرفتي تحبين
    ما انتي من الى يستحق الموده

    ماتعرفين الحب والعطف واللين
    ولا عاد في قلبي على الحب شده



    3/صوت الفناجيل....

    ياحبيبي لاتواعد مواعيد وتغيب
    دامك تقول المواعيد من غير شهوه

    والله اني من عرفتك وسميتك حبيب
    اسمع بصوت الفناجيل وماشفت قهوه



    4/اثنى عشر شهر....

    التحدي والتصدي عادة القلب الصبور
    والصمود اقرب مسافة لكن الفترة دهر

    والخساير عاندتني حوطتني بلف سور
    والخيانه للامانه زودت قلبي قهر

    كنت ابقدم للنهاية لكن الدنيا تدور
    وقفت وياي ليلة وكتمل ضدي شهر

    كل ماطلت الحقيقة وامتلا قلبي سرور
    طاولتني من عذولي طعنة وسط الظهر

    حرت اميز في دروبي بين نار وبين نور
    بين هجعة ليل ولا صحوة اجفان وسهر

    خانت ظنوني وعيوني خانني ذاك الشعور
    اقطف الشوكة بكفي واحسب الشوكة زهر

    مشتهر بلسان صادق ماحكيت الصدق زور
    ولا حكي عني لساني ولا جهرت ولا جهر

    كم كتمت السد وافي خايف اعصابي تثور
    لين باح السد لما مدمعي بان وظهر

    ولا طوت رجلي مسافة ولا اثر فيني شهور
    ولا كوت قلبي حريقة ولا طفلي ضوى نهر

    معتري درب النهاية بعبر ضفاف البحور
    واشبك الدنيا بكفي وادفع ايامي مهر

    ودام هذا عنفواني واضح بين السطور
    من يلوم الدرب فيني لو قهرته او انقهر

    وبتدى مرة جديدة ودام انا قلبي جسور
    تجربة والعمر مرة والسنة اثنا عشر شهر



    5/يجيني يوم وعطيها....

    انا ما اخطيت في حقك ولكن الكلام عتاب
    اعاتب والعتب كلمة تفسرها معانيها

    اعاتب واحسب بهرجي الا مني حكيت حساب
    وكلمه يستحي منها لساني يبتدى فيها

    واذا انت من العتب تزعل علينا وابتصك الباب
    ترى ما نيب قاصدها ولاني فيك ناويها

    ولا ودى على الفرقا وقلبي داخلي مرتاب
    اشوف ان الهوى خدعة واشوف القلب راضيها

    واشوف ان الهوى فرقا مواليف وعناد احباب
    واشوف ان الجفا خطوة ولاني قادر اخطيها

    وقلبي لو عشق يخلص ولو طالت عليه رقاب
    وتشهد له دروب الحب حاضرها وماضيها

    عشقنا والهوى حسرة،مشينا ولاامل كذا
    بدينا نانبني منها قليل من بلاويها

    عرفت الحب من عمري صغير بالغرام وشاب
    وقلبي للحبيب اكبر من الدنيا وما فيها

    صحيح انى نويت ابعد ولكن الهوى غلاب
    وهي رحلة بديت بها ولا ادري كيف بنهيها

    تحريتك شروق الشمس وشفتك للشروق غياب
    ولا اضنك تبيع العشره اللي كنت شاريها

    بقى لي بالهوى نظرة وتغريبة ودمع اهداب
    وقصة بترك لسانك على العذال يرويها

    واناجي باقي حروفي وبالف للفراق كتاب
    قصايد تملي اوراقي ارددها واغنيها

    واذا مرتني الذكرى وجرحي بالحشا ما طاب
    بتبعدني وتدنيني وببعدها وابدنيها

    وانا عيب علي اشكي من الدنيا بدون اسباب
    مدامي ما خذ منها يجيني يوم واعطيها


    6/خطاك السو....

    لان الدمع ما يسخي عطاه الا على الاحباب
    ترى ما للهدب دمع صدوق الا مع احبابه

    ومدام ان الدموع اصدق تعابير الحزن باهداب
    حرام ان الدموع تجف طليلة فترة غيابه

    هذاك اللي شعل شمعة ضوت كل الدروب وذاب
    فقد رمل الوطن دوسة قدمه وعطر ترحابه

    فقده من الثرى ضيق وتراحيب وسهل وهضاب
    فقده من الوطن حتى عذوبة ماه واعشابه

    يغيبه المرض عنا وكنه بيننا ما غاب
    بعيد وشعبه الوافي عليه اقرب من ثيابه

    سكن باهدابنا حتى يلامس رعشة الاعصاب
    فرش بدروبنا قلبه ولف الشعب باهدابه

    تضيق ابنا الدروب ونرتجي في وجهه الترحاب
    حشا كن الشوارع ماتمر الا على بابه

    من اول ما حكم واسس ومسس للثبات اطناب
    سجد قلبه على ملة رسول الله وكتابه

    غرس فينا الوفا نبته مثل ماتنبت الاعشاب
    وقال ان الثرى له حق نشقى له ونشقى به

    وطن ما به وطن غيره..ولا غير التراب تراب
    مادام الله خلق دون البلاد سباع وذيابه

    عرفت انه يهاب انه يهاب وما يعرف يهاب
    يحفظ الدار يوم الجار ثار وكشر انيابه

    وقف للعالم باسره وقوف الفاقد الطلاب
    خطب خطبة شجاع وفزز التاييد بخطابه

    عتق دمعة فرح تلبس لميعاد الرجوع ثياب
    حشا كن الدموع تعرف علم الغيب واسبابه

    خطاك السو وعيون الحسود وهرجة الكذاب
    وتعدتك المنايا يا ظلال الشعب وحجابه

    فبعدك يا طويل العمر يبقون القراب اغراب
    وترى يا شيخ ما كل القلوب البيض تتشابه

    يقولون الغلا واحد وانا قايل: شجاب لجاب؟
    هذاك الشيخ جابر غير..ذاك الشيخه اولى به

    هذاك اللي فقد لذة منامه لاصغر الاسباب
    هذاك يموت ما خيب هقاوي من تهقوا به

    هذاك ان لد للعذرا تغطرف له ولع واعجاب
    هذاك اللي اسر عشق القلوب بطرف سبابه

    هذاك اللي من افعاله عجز في مثله الا نجاب
    كان الله منع بعده يجي شخص يتحلى به

    هو اللي شتت جموع الضياع وولف الاحزاب
    هو اللي جفف دموع اليتيم ويتم صوابه

    هو اول من حما شعبه من طعون الزمن وا نصاب
    هو اول من نذر نفسه يرد الحق لاصحابه

    كان الله خلق بينه وبين المستحيل احجاب
    فلا يعرف محال الا يكون اسهل من صعابه

    ابو مبارك تطامن له خشوم وتفتديه رقاب
    عريب ان ما زها بالمجد كان المجد يزهابه

    ودام الله خلق فينا جماعات وامم وانساب
    ابي هو بالجود انساب خلق اكرم من انسابه؟

    تحلى بالصبر يا شعب...لا تحزن ولا ترتاب
    ترى شعب الكويت اكبر من ان الشك ينتابه

    وعساكم ان تحبوا شيء كرها يا الو الالباب
    وعسى ان تكرهوا شيء وهو خير لطلابه

    نبي نصبر على كربه ولو ان الصبر غلاب
    عزانا للبلاد انه بيحيا له ويحيا به

    ومثل ما قد سجد بارضه لوجه الباري التواب
    بعون الله بيرجع له وبيسجد على ترابه

    وتطير من الفرح بسم السلام من الحمام اسراب
    بعدها تكتمل فرحة رجوع الشيخ الاحبابه

    وعسى رب السما يفتح لدعوات القلوب ابواب
    وتكون اصدق دعاوى شعبه ملباه ومجابه

    ولان الدمع ما يسخي عطاه الا على الاحباب
    حرام ان الدموع تجف طليلة فترة غيابه


    7/قدها وقدود...

    انا ربتني الدنيا على جزل العطا والجود
    ونفسي للوفا والطيب وفعل الخير جزامه

    واعارض منهج الهابط واوافق للصعود صعود
    واسير نفسي بعقلي مدام النفس هدامه

    ولا تثر بي البسمة ولا كحل العيون السود
    ولا يقوى على قلبي صغير الحسد واجسامه

    ارد الجود بامثاله واقابل بالجحود جحود
    وترى لا خير في رجل يوطي للردى هامه

    وعندي مع اهل العليا مواثيق وثلاث عهود
    اوفي له مطاليبه واوده وارفع اعلامه

    اعايش مركب الدنيا على متن القدر مولود
    ابعرف هو صحيح ان القدر بالناس دوامه ؟

    ومن وين الزمن مقبل والى وين الليال تقود
    ومن في هالزمن يقدر يوجه خطوة اقدامه

    ومن له بالزمن غاية ومن عنده هدف منشود
    ومن منا قدر يعرف خفايا مقبل ايامه ؟

    عرفت ان الشقا باقي ، عرفت ان الحسد موجود
    عرفت ان القدر يفرض علينا باسوا احكامه

    لقينا بالعرب حاسد وشفنا بالعرب محسود
    وبه ناس لنا ضامت ، وبه بالناس منظامه

    وينقص بعضنا خوه وينقصنا وفاء وعود
    مدام الحسد باقي وبعض الناس نمامه

    ولا ترجى بها الدنيا من ربوعك يجيك اسنود
    ولا تشره على رجل عيونه خانت اقدامه

    وقابل خطوة بخطوة وجازي بالصدود صدود
    تناسى غلطة الصاحب عليك بلحظة اخصامه

    ولا تخطي ترى لصبر الحليم اليا سلاك حدود
    تروى واعرف بضرب الحديد تفكك لحامه

    تجنب كسرة الخاطر ولو حبل الزعل مشدود
    تراك بكسرة الخاطر حكمت القلب بعدامه

    ولا تزعل على رجل بذل لك ولرضاك جهود
    ولا تامن من الحاسد رضاه ورفعة ابهامه

    نبي نصبر على الدنيا قلوب بالحياة زهود
    مدام ان البخت عيت توفق رمعة سهامه

    وانا ما قلتها راجي ولا اطلب بعدها مردود
    ولكن الفتى وده يحقق جملة احلامه

    وبمشي لاخر الدنيا ولو كل الانام اقعود
    وعن وجه الزمن بكشف حقيقه وارفع الثامه

    صحيح اني صغير السن ولكن قدها وقدود
    وانا عندي مع الدنيا مواقف ترفع الهامه

    طموحي يملي العالم ولابه للطموح قيود
    مدام ان الامل طبعي ( عرين وصرت ضرغامه )

    خلقنا الله من ترابه ولاحضان التراب نعود
    تحت رمل الثرى نبقى تغطي جسمنا خامه

    سلفنا ما لحقناهم تحت قاع التراب رقود
    ولا يبقي من الميت سوى ذكراه وعظامه

    ولو طال العمر فاني وترى عمر الفتى محدود
    وكل يطلب المولى يبيحه يحسن ختامه

    وانا بلغت بلساني وربي والانام شهود
    وصحف البينة جفت وعنها رفعت اقلامه


    8/اقرب الناس....

    بمشي على درب له الناس يسعون
    واصد عن درب الدجي والعتامة

    وبقصر اليسرة عن الضيم والهون
    وطلق يميني للصخا والكرامة

    وبحترم نفسي وانا شخص ممنون
    ومن يحترم نفسة وجوب احترامه

    ماني من اللي في ذرى الحيط يمشون
    ولامن اللي معتلي في مقامه

    متواضع وامشي على الحق بالهون
    متوسط المعرفة والشهامة

    ولي مجلس دايم له الناس يلفون
    شرعت بابه والدلال العلامه

    مايفتح الا فيه الاجواد يدنون
    ويالله عسى اللي يقرب للسلامه

    هذا طريقي وكثر الناس يدرون
    صديت عن درب حلاله حرامه

    ميزت ربعي بين عاقل ومجنون
    واكشف بليد المنفعة من سلامه

    واهل المصالح لو على يوم يبنون
    في يوم ثاني يرغبون الهدامه

    واهل الحكي لو لك عن الناس يحكون
    بيجيك يوم ويقصدك في كلامه

    لاصار سيفة لاقرب الناس مسنون
    يضرب رفيقة وان اقوى في عضامه

    ناس مع الكلمة يروحون ويجون
    بس المصيبة يدعون الفهامه

    ولانيب ديان ولانيب مديون
    ولا بغيت من الهروج الملامه

    ولاطلبت من المخاليق يبكون
    ولا بغيت من الحزين ابتسامه

    بمشي بدربي واترك الناس يمشون
    كلن على كيفه رقى كل هامه

    ولا صرت انا من راعي الطيب مطعون
    ابيستوي قرب الرفيق وعدامه

    وان خاب ضني باقرب الناس وشلون
    بعطيك ضني يارفيق الندامه


    9/الدنيا بخير....

    الظلام اليا تبرى من مدرات النهار
    يبتدي عمره ضرير وينتهي عمره ضرير

    والعيون اليا عماها حقدها تبقى صغار
    ماتهادي مستواها غير للعقل الصغير

    والدروب اللي نهاية وصلها ذاك المسار
    ماتساوت مع طموحات الفهيم المستنير

    من يميز في طريق الشر حسن الاختيار
    من صرخ في كل قلب مظلم بصوت النذير

    من قدر ياخذ بحق التايه الضايع قرار
    من دفع عمره لحب الناس لو يبقي فقير

    من يقيد لكل فزعه للندم همسة شرار
    من يطفي بالقلوب المدمنة نار السعير

    من خلقنا ماعهدنا غير حب الافتخار
    نملك الصبر الكبير ونعشق الدرب العسير

    همنا نرفع بلدنا مع صفوف الازدهار
    ونتذكر يوم كان ترابها فرش وحصير

    وللاسف عشنا وشفنا حرب درب الانحدار
    حرب تشتيت القلوب وحرب تانيب الضمير

    حرب اقسى من حروب النار وحروب الدمار
    حرب ابشع من نزيف الدم وبالسيف الشطير

    بالسموم اللي تروج بالكويت بكل دار
    السموم اللي تردوا من سبايبها كثير

    والشباب اللي تمادوا في دروب الانتحار
    اصبحوا فيها رهينة لعنة السم الحقير

    يستغيثون بعمار النفس من نسف العمار
    يرتجون وداع ظلما الليل للصبح المنير

    صرخة المدمن تهيم وترتجي رفع الستار
    رددت عند الهدف كلمة يصير او مايصير

    اشعلت بين الضلوع العوج بعد النور نار
    وادمعت كل العيون المشفقة دمع غزير

    وامتلت كل الحناجر من صدى الصرخة مرار
    وارتوت كل القلوب الضامية من زمهرير

    افة الادمان زادت وابتدت بالانتشار
    والوجوب انا نحدد في تلاحمنا مصير

    ناخذ اطراف القضية في عيون الاعتبار
    ونرسم دروب النجاة وخطة الفوز الكبير

    ونرسم خطانا وتكفي دمعة المدمن شعار
    ويكفي انا من ربوع المجد واخوان الاسير

    ان نوينا ما بغينا غير حرب وانتصار
    وان ضمينا ما رضينا غير نروى من غدير

    اتحدنا قلب واحد للهدب والاختيار
    والفضل يرجع لربي ثم يرجع للامير

    وعلموا من يفقد احساس الامل بالانتظار
    الهدف لازال حي وتوها (الدنيا بخير)



    10/نار وبارود....

    حنا اليامنا وعدنا وفينا
    واليا عطينا نعرف الجود ونجود

    وما نذبح البسمه ليا من حكينا
    وما نفرض الغلطة على البيض والسود

    من طبعنا لا من عطينا عطينا
    جود من الموجود والجود موجود

    بعنا المذلة للضعيف وشرينا
    عزة نفوس وجد واخلاص وعهود

    نضرب خطانا بالعصا لاخطينا
    حتى ولوكان الخطا غير مقصو

    ومانزعل اصحاب الجمايل علينا
    هذا وحنا نجزي الجود بالجود

    يكبر غضبنا لاتعزوي حدينا
    نرضيه لو نبذل على ارضاه مجهود

    واليا انتخن المترفات اعتزينا
    نفزع ولا نرضى على البنت منقود

    نزعل ونغضب وان زعلنا نوينا
    كن الهدب والعين نار وبارود

    نرضى نموت ومدنا في يدينا
    ولانعيش بمجد ضايع ومفقود

    نعم خضعنا روسنا وانحنينا
    لله ولا غيره مع الناس معبود

    مثل الغصون اليا انثنت انثنينا
    وقلوبنا خشاع ركاع وسجود

    نتبع ونامن وبالرسل واقتدينا
    بمحمد وعيسى وموسى وداود

    خفنا من اسباب الضياع ان قرينا
    باهل الجحيم وقصة اصحاب الاخدود

    نمشي على كف التراب وروينا
    من قلب مزن مرعد يرعد ارعود

    يكفي فخرنا باصلنا لا انتخينا
    حنا عرب من واقع جدود لجدود

    ماقد تعلمنا الخطا واعتدينا
    ولا قف في صفنا شخص مضهود

    الصبر فينا مبتلي وابتلينا
    نصبر ولا نرجي من الوقت مردود

    لو يشكي منا التعب ماشكينا
    ولا تخلفنا ولا نخلف وعود

    حنا ليا منا وعدنا وفينا
    واليا نوينا قد الافعال وقدود

    غير القلوب الخاشعة مارجينا
    والدمعه اللي تجرح اوجان وخدود

    لا الكره قايدنا ولا الحقد فينا
    ماحنا من اللي يجزي الطيب بجحود

    هذي عوايد طبعنا واكتفينا
    الله خلقنا ازهود ونفني له ازهود

    اقولها والله وكيل علينا
    بسم العلم لاصار عالي ومرصود

    اقولها اقولها وانتهينا
    حنا الكويت قيادة وشعب وجنود



    11/يقولون مالا يفعلون.....

    ما بقى الا سود الايام تحرمك الرقاد
    كيف الاوهام اتجرا اتسريك مغبون

    من متى تجزع من الدمع و تخاف البعاد؟
    من متى تقفي بك ظنون و تجيبك ظنون؟

    صرت تاخذ كذبتي صدق و مزاحي وكاد
    لو بقول اني بخونك تحسب اني بخون

    ما تعرف ان كل شاعر يهيم بكل واد؟
    و انهم دايم يقولون ما لا يفعلون؟

    ابك انا لا قلت ابنساك و انكرت الوداد
    و الله اني مانسيتك ولاهم يحزنون

    من جزع من صفعة الشمس يطمع بالبراد
    و من فقد وجهاته الخمس يلقى بك ركون

    اعتبرها هفوة انسان او كبوة جواد
    لو بتسمح فانت غالي و لو تجرح تمون

    عد صداتك مروة و طعناتك ضماد
    خلهن لاراحن طعون و لا ردن طعون

    خنجرك يستاهل الطعن و متوني شداد
    و منك يازين الخناجر و يا بخت المتون

    ردلي حنية المزح باحساس الجماد
    خلنا واحد يجي صلب و الثاني حنون

    موت فيني و اندفن فيك بثياب الحداد
    و ان حييت اموت لرضاك و احيا بك بهون

    مره ارقد بالكفن و انت ترقد بالمهاد
    و مرة ارقد بالمهد و انت ترقد بالكفون

    ادري ان شجونك شجون و اعنادك عناد
    و البلا ان عنادك عناد و شجونك شجون

    ربك اللي سخرك لي تقود و ما تقاد
    و الله الخالق و لله في خلقه شوون

    ازرع ضلوعي من رضاك و ابشر بالحصاد
    لعنبو من جيت ترضيه و ترد محزون

    بس تسوالك بلد ؟ قول تسوالك بلاد
    انت كل العالم بكون و لحالك بكون

    مابعد محبتك حب و مرادك مراد
    غير كونك سيد حشاي تدري من تكون ؟

    نعمتين اختصوا الخلق من جود الجواد
    كافل الارزاق من حيث مالا تعلمون

    البنون و نعمة المال في عيون العباد
    زينة الدنيا بلا شك في كل العيون

    مثل زينة دنيتي بس عندي شي زاد
    من عرفتك صاروا المال و انت و البنون

    انتشي بك نشوة التيه لعناق الرشاد
    و افزع الك فزعة القرم لشهاق الزبون

    و احصنك تحصين الارزاق عن درب الفساد
    و اعشقك عشق المظاليم لفراق السجون

    لو تزيد الشوق جمرة تحولني رماد
    لو يزيد العشق شعرة بوصل للجنون

    خل هقواتك كبيرة و نظراتك بعاد
    كانك انت بكبرك تهون من اللي ما يهون ؟

    ازعلك و ارهن حياتي تحت رحمة زناد
    تهبى لا و الله الا انت و الموت تهبون

    عاد اذا ما ارضاك هرجي و لا اللي قلت فاد
    اننا لله و انا اليه راجعون

    و انت باكر بتعرف على ناس جداد
    و الكلام يجيك من كل شكل و كل لون

    لا تحسب ان كل كلمة بتسمعها وكاد
    و لا تصدق هرج شاعر و تخدعك الظنون

    دايم اعرف كل شاعر يهيم بكل واد
    و ان هم دايم يقولون ما لا يفعلون

    حتى انا اللي قلت اعشقك و ما اطيق البعاد
    يمكن اطلع ماعشقتك .. و لا هم يحزنون



    12/قصة حياة....

    جتني ظروف للكدر مستعده
    قامت تحدد لي الاحزان ميعاد

    مرة مع حظي ومرات ضده
    واليا تكدر خاطر القلب تزداد

    في دنية خلقت على الناس نده
    مردودها للخير تجرح واجهاد

    اتجي على المظلوم وتبيح سده
    واتجي على الظالم تساهيل وامداد

    والصدق فيها ما لقى من يعده
    والكذب يلقى له مع الناس شهاد

    واللي فقد حق عجز يسترده
    يصبح على تسديدة الدين معتاد

    ومسكين من راد الزمن يستبده
    عيت عليه اقدار الايام تنقاد

    تطرح به الدنيا على القاع مده
    مثل الفريسة والمقادير صياد

    ضاعت حياته في لحاف ومخده
    عدت عليه ايام بغفول ورقاد

    وماله عن دروب الوعر من يصده
    ولا هو عن دروب السلامات نشاد

    تلطمه مو جات القدر فوق خده
    وتخطي به الخطوة من بلاد لبلاد

    حبله قريب وعاجز لا يشده
    يحسب جميع الناس قاصين وبعاد

    عاند حياته لو حياته تحده
    وادى سنينه كلها عناد بعناد

    اصحى من الغفلة ترى العمر حده
    للوقت سجاته وللموت ميعاد

    وهذي هي الدنيا تجي مستجده
    تلقا بها المازح وتلقا بها الجاد

    قصة حياة ومننا مستمدة
    ويلزمها تنفيذ واخراج واعداد

    عشنا على كف القدر فوق يده
    الله خلقنا عباد ونفني له عباد

    ولا حاصل للحي ماكان وده
    ولا حاصل للي يموتون ميلاد

    ويكفيني اني من ظلوه الموده
    ومالي مع الخسران بالدين مقعاد

    وان جتني الغفلة علي اوقات شدة
    اصبح لها صداد والقلب صداد

    وتقدير ربي مالنا في مرده
    ومعارض لتقديره اشراك والحاد



    13/ثامن العجايب....

    اسمعي والكل منا له هواه وله ميوله
    لاتمسين بكلامك شعرة بروس القرايب

    ان حكيتي ماوفيتي وان تحديتي عجوله
    تحسبين ان كل فعل تفعله يمناك صايب

    تحسبين انك خذيتي بالحشاء صولة وجوله
    تحسبين اني ذكرتك مع نسانيس الهبايب

    والله انك لو ذبحتي خافقي لالقاك حوله
    عاشقه تشقىبفلب من طريق العشق هايب

    كم رضيت اسكت عليك من القهر وانتي زعوله
    خايف اضحك واستفزك واهجرك واعيش ذايب

    ادعيت انك خجوله وادري ان منتي خجوله
    وادري انك تخجلين الشمس من فوق السحايب

    مايحببني بقلبك يالهنوف الا فضوله
    وماينسيني غرامك غير تكرار المصايب

    عاشقه جيتي ورحتي يالحبيبه يالعذوله
    مابنيتي لي طموح ولاتركتيها خرايب

    تستبيحين القلوب وتستحقين البطوله
    واستحق بعدك تايب واموت تايب

    ياكثر ماشال قلبي شيء اكبر من حموله
    ولاعفيتي عن غلاه ولابخلك بالوهايب

    كنه ارحم من همال المزن للزهر بذبوله
    وانتي اقسى من سموم القيض وكفوف اللهايب

    وانتي ادرى في غلاك بداخلي شاللي يزوله
    وادخلي دخله على الله واحفظي ذيك السبايب

    ماخبرت اللحظه اللي حللت قربك تحوله
    ولاهقيت اني بشدد للجفا قلب وركايب

    ماهقيت انك تحسبين الزلل وانتي جفوله
    وماهقيتك تكرهيني كثر حبك للطلايب

    كن قلبي في وصالك وابل لحظة نزوله
    وفي فراقك مثل دمعه تنحدر من عين شايب

    كنت ابي وقفه حبيبه تنهض القلب بخموله
    طافح بالعشق وانتي عايبه والحظ عايب

    كنت عصن كل كف غير كفك مايطوله
    كنت درب ودمعتين وقلب وجروح عطايب

    كنت ابيع العمر كله وارخصه عرضه وطوله
    للعيون اللي هدبها ثامن السبع العجايب

    بس ابرضيلك غرورك واكسر القلب بذهوله
    وقتها ماكنت افكر صايب او كنت خايب

    والرجل لو ماعلى بالشهامه والرجوله
    صدقيني صعب يقدر يملك قلوب الحبايب

    صدقيني مايوالف خافق البنت بسهوله
    بالهوى يابنت حواء غير طلاب النشايب

    والسهر والعشق الاول والهوى واللي ينوله
    شيء اقسى من همومك والعنه حاظر وغايب

    والهموم اللي دعتني من بعد سن الطفوله
    كلها من تحت راس العشق ملعون الصلايب



    14/قالها حامد....

    تمادي و انا مثلك تماديت بهجر و بعاد
    و كل مثل عناده خفوق ثابت صامد

    و اذا عندك بعادي عيد ترى عندي جفاك اعياد
    و عسى طول الجفا مني يلين قلبك الجامد

    ابضحك واظهر البسمة و لو ان الجروح اجداد
    و ترى قلب الحريقة ضو و لو وجه الحطب رامد

    بكون اكبر من الغلطة و بعلن للهوا ميلاد
    اذا كان الخطا منك مجرد ثورة الخامد

    و اذا كان الجفا منك مسافات و غلا و عناد
    تراي اكبر من عنادك و قولي قالها حامد



    15/تزعلين وتقعدين....

    عافت الشمس المدينة و اعلنت وقت الزوال
    رغبة للنوم منها مع عيون الناعسين

    ابعدت من يوم شافت بالسما ضي الهلال
    كنها كانت تهزا بالهلال وتستهين

    كفكفت صبح التلاقي من ورا روس الجبال
    واستخارتني وراحت وابعدت عن كل عين

    وانتي اخطيتي خطاها وانعزلتي بالوصال
    ولا رحلتي من سكات ولا وعدتيني تجين

    عشت عمري بالمحبة في سبيل الاحتمال
    وانتي تعيشين عمرك تفرحين وتجرحين

    من غرورك في جمالك ما عطيتيني مجال
    وادري انك تفهميني لو بغيتي تفهمين

    كيف اشوف الشمس تشرق بالسما وانت ظلال
    ومن يعيش بوسط غار للذياب الجايعين ؟

    كنت احسب الكره زايل والجفا لو طال زال
    ولا بديتي بالغرام ولا بقى فيني حنين

    اشهد اني ما خطيت ولا نويت الانعزال
    وما خدعتك في غرامي لين شفتك تخدعين

    اصدقي بالوعد مرة لي ولو فيها سوال
    من عرفتك ما اذكر انك توعدين وتصدقين

    كنت اشوفك من عيونك تامرين اقوى الرجال
    والله اني قبل اعرفك ما هقيتك تخضعين

    كنت اشوفك تبعدين وقلت من باب الدلال
    وان بعدتي عن عيوني قلت باكر ترجعين

    كنتي اكثر في عيوني من عدد وبل الخيال
    وين انا ما الد وجهي كنت اشوفك تضحكين

    وان بغيت اصد عنك من يمين ومن شمال
    ما قوت عيني تلفت لا شمال ولا يمين

    عاشق والعشق بلوى واشهد ان الحال حال
    ولا تركتي رحمة الله ولا عرفتي ترحمين

    وادري انك في غرامي للاسف نلتي منال
    افترقنا في دقايق والسبب لعنة لعين
    مجلة مدرسة المشاغبين - منتديات مدرسة المشاغبين



    اقرا ايضا : قصص حب
    القطط في الحلم
    رواية بويات
    طريقة عمل الكوكيز
    الدورة الشهرية
    نكات
    الصلاة في المنام
    اسقف معلقة
    فوائد الحلبة
    كلمات اغاني خالد عبدالرحمن


    حبك اشبه في غرامي بالوصال الانفصال
    ويلعب الخفاق لعبة كبرياء الخاضعين

    بالهوى ماهي غريبة نكبة عيال الحلال
    ولاني اول من يصون ولا انتي اخر من يهين

    الصداقة في عيون الناس منفى للعدال
    وكان ردت للصراحة كلبونا مذنبين

    المحبة شبه زالت والصداقة لاتزال
    بس اببقى في عيونك حامد اللي تعرفين

    علميها يا قصيدة واضربي فيني مثال
    عرفيها بالبداوة في طباع الاولين

    علميها كيف نصنع صبرنا والاحتمال
    علميها كيف نفلح بالعمل دنيا ودين

    علميها في سوالف حلنا والارتحال
    علميها كيف نظهر جورنا للجايرين

    علميها يا دقايق ، علميها يا ليال
    علميها يا عصور وعلميها يا سنين

    ان عشقنا ما بغينا غير عشق بالحلال
    وان نوينا ما لفينا كود ناس طيبين

    كاملين في عطانا بس لله الكمال
    والرجل فينا غرامه لو يعين ويستعين

    ابدوي ما يقوده للردى شد الحبال
    يعسف اليد الشحيحة للعطا حتى تلين

    همنا فعل الرجولة رمزنا لبس العقال
    وانتي المكياج كله صار في وجهك سجين

    عندك المكياج موضة تحسبين انه جمال
    صار همك في حياتك تكشخين وتطلعين

    والا انا قلبي بقى لي بالمحبة راس مال
    والله اللي مبتليني بالهوى والله يعين

    ان بغيت اعشق ابالقى كثر حبات الرمال
    لكن انتي لو بغيتي صعب مثلي تعشقين

    قلت لك كل الصراحة واختم اطراف الجدال
    وان زعلتي من كلامي تزعلين وتقعدين



    16/صح النوم....

    تعودنا على حمل الجمايل و الزعل و اللوم
    ولا نرفض عتب غالي ولا نزعل من جداله

    تمنينا حوز اغلى مكانه في وجيه القوم
    ونعيش الخوه بوقت يضد رجاله رجاله

    تعلمنا من الدنيا وزدنا للعلوم اعلوم
    وسقنا للدروب قلوب رجليه وخياله

    وقفنا للزمن وقفة شجاعه والقروم قروم
    الين ان صار واحدنا بديل اقواله افعاله

    الى منه خذا ياخذ مثل ماياخذ المحروم
    والي منه عطا يعطي ولو من لقمة اعياله

    ولا بتنا ولو باتت رحايلنا بدون عزوم
    نساوم للفخر بارضه ولو باي من اشكاله

    ولا عفنا ولو شفنا على باب النهار سموم
    ولا خفنا ولو طفنا بمخراجه ومدخاله

    واذا شفنا عناقيد العنب فوق الشجر ملموم
    نهز غصون عنقوده واذا ماطاح نرقا له

    نصبر بعضنا بالكذب الابيض والهدف معدوم
    ونقول انا وصلنا له لو انا ما وصلنا له

    وانا واحد من اصغرهم طموح وللطموح رسوم
    على وجهي مثل قوله بغى شي ولا ناله

    عطيت ولا رضيت اخذ من سلوم البخيل سلوم
    ولا عمري رضيت اقعد على قلب العرب عاله

    ولا ارضى بالفخر فزعه وجواسيس وكلام رخوم
    ولا عمري حنيت الوجه بعد المجد لحثاله

    غناي الله وانا رجل عزيز مقدر محشوم
    قنوع بالقدر وان قلت فال الله ولا فاله

    بسيط يرمي حموله على متن الجبال هموم
    بوقت الاسف عيت تطيق همومه جباله

    بوقت نزل خشوم ورفع من رداه خشوم
    وخلي قيمة الرجال بين الناس برياله

    صحيت وقلت للنايم بعد ماقام صح النوم
    زمانك ماعطاك الا صور وحطام تمثاله

    سنين اطالع البارق وقول ان المطر محتوم
    وهو ما مد لي كفه وانا ما طلت هماله

    ارد اكذب على نفسي واقول ان النخل مفطوم
    وهو ما بالنخل عذقي عطش ماذاق شلاله

    وانا مابي من البارق هماليل ومطر وغيوم
    ولو ذقت العطش بعيون طرقية ورحاله

    تعلمت الصبر من كنت طفل بالمهد مزموم
    الين ان صرت رجل لا انتخوا به طوح اعقاله

    وانا ما احلف بعد عمر طويل بدفنتة المرحوم
    بقول الله ولا غير الله الرحمن نلجاله

    ومثل ما بالمطر خوه الي من اهل كوم وكوم
    انا قلبي بعد يقدر يدك البيد بلحاله

    واذا اسمي واصل الدنيا قبل لا القى الحياه بيوم
    ابتكرها وانا اسمي يضرب التاريخ بامثاله

    واذا ربعي وهم ربعي تناسوا حقي المهضوم
    بعيش اشره على قلبي قبل ارثي على حاله

    واذا كفي طعن كفي براس الخنجر المسموم
    بعرف ان النصيب اقرب من الرجال لظلاله

    مدام ان الزمن خلا الشجاع بوقتنا مهزوم
    اجل خلو ضعيف النفس يقصر شرة اشواله


    17/سرمدية.....

    من عرفت العلم و انتي يالليالي سرمديه
    و الوصول اغلى طموحات الفتى باول شبابه

    و المهابه ماتهادت غير لنفوس رديه
    ليت في قلب الليالي للفتى قدر و مهابه

    دنية تجمع صفاتين الخجل و العنجهيه
    كنها بنت يزود بحسنها ثقل و ذرابه

    يوم جتني تمتحني في زمان الجاهليه
    جيتها رجل تحلى في تقاليد الصحابه

    بالعطا تبخل علي و بالعذاب تموت فيه
    عشتها قلب رحوم يكره الضيم و يهابه

    بس ابدري وش نهاية وصلها و اخر هديه
    و هو صحيح ان القصايد للجريح اول عذابه

    و من عرف لك يالليالي و انتي اكثر من هويه
    و من تحلف في ترابك مقتنع باللي جرى به

    من قدر يفرض طموحه في زمان المعمعيه
    من من الناس يتجرا يتركك و انتي ترابه

    السوال يعيد نفسه و الا جابه مبدئيه
    السوال يعيد نفسه والاجابه مبدئيه

    الرحوم يخون ناسة والخوي ينسى خويه
    والقلوب اللي تخالف ودها صارت تشابه

    و الخلايق ما تسوي طيبها جود و حميه
    كلنا نضحك بوجه مبتسم للغدر نابه

    لو يصير الموت راعي .. كلبونا له رعيه
    لو زعل نزعل و نرضى لا رضى حضرة جنابه

    و الله اني ما نويت اكشف ملفات القضيه
    لكن اني شفت شي يفقد العاقل صوابه

    يا الحياه انتي غديتي بالغرابيل اجوديه
    كنك اللي مايميز بالخطا غير ارتكابه

    ما عطيتي غير جرح و لعنبوها من عطيه
    و الله انك ما عطيتي خير للقلب و صوابه

    خاينه .. ما انتي عزيزة خافقي يا الاجنبيه
    جنبي عني و اجنب من مداهيل الغرابه

    و اخذ بدرب يدرك للقى روحه و جيه
    يا يموت الدرب و لا بدفن القلب بضبابه

    و ان ذبحتني تمني رجعتي و ابكي عليه
    لين تملين المحاجر بالبكا حزن و كابه

    و ادفنيني بين ظلك و الخيوط العسجديه
    لو لقيتي بعد موتي واحد بنفس الصلابه

    شاعر قدم قصيده لاغلب ايامك ضحيه
    بين ناس مايطيقون القرايه و الكتابه

    يا زماني لو بقى للشعر في صدري بقيه
    بكتبه و ارسم خيالي بالورق و اروي سرابه

    و كان ردت للعناد و عودت للمقدريه
    و الله اني ما اتنازل لين اعديه السحابه

    يا زمان مبتلي به و ابتلى فيني بليه
    لا تلوم اللي يخونك كان له عقل و لبابه

    بقفل القلب المشقى عن هبايبك العتيه
    و دق بابه من بعدها لو قدرت تدق بابه

    الحياه اللي تسمي لعبة الشاطر خطيه
    ما تساوت في عيوني مع جناحين الذبابه

    اذكر اني كنت عايش بالليال الاوليه
    و اذكر اني كنت عايش وقتها باحضان غابه

    ما عرفت الا عبارة مثلها مثل الوصيه
    عيش عمرك ذيب تسلم من مخاليب الذيابه



    18/رد السوال....

    انتبهت لدمعها بالهدب و الكحل سال
    لين جفت عينها دمع و القاع ارتوى

    و ابتدت لحظة جفا و انتهت لحظة وصال
    و انطفى نور السعادة و احسب انه ضوى

    ما اكتفيت من الهوى و الغرام اربع ليال
    و اقفت ايام التلاقي و جا وقت النوى

    كنت ابلسى و ابتسم و التفت عنها شمال
    لا قويت الصد عنها و لا قلبي قوى

    ما هقيت ان الهوى عذب قلوب الرجال
    لين ضاع القلب مني و تفكيري سوى

    رحت ادور دفوة الشمس ضيعت الظلال
    جيت اطفي شعلة النار و القلب انكوى

    ما هقيت ان السعادة خيال في خيال
    تروى قلوب الحبايب و قلبي ما روى

    كنت ابشتال الهوى و الهوى ثقل الجبال
    و ان تحملت الجبل ما تحملت الهوى

    كنت ابسلى بالهوى و الهوى صعب المنال
    ما رضا لي حظي اللي طواني و انطوى

    قلت لا فراحي تعالي و لا قالت تعال
    و الخفوق ان قلت ابقبل على صدي نوى

    الله اكبر لا شرقت شمس يتلاها زوال
    كيف ابفرح في صباح مع الليال استوى؟

    لا حصل بالحب قسمة و لا جا لي مجال
    غير اشوف معاند الجرح و عناد الدوى

    شبت النيران و اقفت و جاء رد السوال
    ما تشب النار يا كود يوصلها هوى



    19/من تحت لي تحت.....

    لو تعرف الخطايا كيف كنت محروم
    كان سود الليالي يوم طحت سمحت

    لو هموم المفارق مثل كل الهموم
    ما تشوفون عيني بالدموع سبحت

    و لو تحن المشاكل عقب حب الخشوم
    كان حبيت خشم المشكله و استحت

    بين صدة عزيز وكبرياء مهزوم
    عين شحت على و عين استسمحت

    بس مالله خلقني من بكاي معصوم
    و ادري انه المحاجر لو تفيض افضحت

    و الله اني على جرحي صبور و كتوم
    لكن ان الدموع ان روحت روحت

    اعذلتني ظروفي و انهكتني عزوم
    و الوجيه احزنت لي و القلوب افرحت

    اشهد ان الليالي ماتعرف السلوم
    قلب جافي لقاه و وجه صافي بحت

    راهنتني تبلل بالدموع الكموم
    و يشهد الله عليها راهنت و اربحت

    احرمت نور عيني من غلا ريم قوم
    بذرة و ارتوتني و اثمرت و اطرحت

    جادل دوم ماهي مثلها كل يوم
    استضاحت غموض و بالغموض اوضحت

    دورت بين قلبي و الهدب درب نوم
    و امرحت وين مدري المهم امرحت

    تنحت اسمي بقلب جيت فيه معزوم
    و اسمها بين جلدي و العظام انحت

    مثل جفني لعيني بالنعاس محكوم
    كل مانمت نامت كل ماصحى صحت

    ما تعارض كلامي غير عند اللزوم
    بس لا قمت اسولف و اندمجت سرحت

    دايم ازعل عليها بس قلبي رحوم
    و هي تموت بعذابي من تحت لي تحت

    مثل وجه العلاقه في ثياب الخصوم
    ان تطيبت طابت وان جرحت اجرحت

    خصها الله بوصف من خيال معدوم
    لا اذان اسمعتبه و لاعيون المحت

    كن ربي خلقها من بياض الغيوم
    و من كفوف السحابه بالورود لقحت

    عن سواها فرقها بالقمر و النجوم
    و كل عذراء تباها بالجمال نزحت

    بالحلا هي كوم و باقي الناس كوم
    كفت عادلوها بالبشر و ارجحت

    حسبي الله على اللي ما بغاها تدوم
    من بعد كيف كانت شوف كيف اصبحت

    لاتحقق وصال و لا فراق محتوم
    خطة قربتني للفشل و انجحت

    لعنة العشق تبقى مثل ضرب السهوم
    لو محى الوقت جرحه صورته ما انمحت

    كيف ابنسى و انا اللي من جفاف لسموم
    ما حشمت العيون و لا الدموع فلحت

    كانها بالحميا كل ربعي قروم
    لو يلدون لاصعاب الظروف صلحت

    اجزم ان كنت ياقلبي شجاع و جزوم
    لد لعيون بنت لا التفت الفحت

    ما تهين البخيل الا يدين الخدوم
    دام كف الخطايا بالجفا لوحت

    نطح الباس باس و نطح اللوم لوم
    و ان تهدت تهد و صيح ان صيحت

    يا تعيش بمعزه ياتموت محشوم
    ودك ان الليالي لا فعلت مدحت

    عمر ضعف الاراده ما يسر الرخوم
    ضربة السيف لو بيد الشجاع ذبحت


  2. #2
    غلاالشمري غير متصل طالب متوسط
    تاريخ التسجيل
    Mar 2010
    المشاركات
    285
    Thanks
    0
    شكر 0 مرات في 0 مشاركات
    يعطيك العافية يالغلا

    تقبل مرووري


    لااايوقف

    غلا11111111111111وي

الدورات التدريبية جامعة نجران
يشرفنا اعجابك على فيس بوك facebook